قالالىق اكىمدىك تاراتقان اقپاراتقا سايكەس، قازىر الماتىدا مەديتسينالىق بەتپەردەلەر مەن انتيسەپتيكالىق قۇرالداردىڭ الاياقتىق جولمەن ساۋداعا ءتۇسۋىن، سونداي-اق ساتۋ كەزىندە باعانى نەگىزسىز كوتەرۋ فاكتىلەرىن انىقتاۋ ءۇشىن رەيد جۇرگىزىلۋدە.
ناتيجەسىندە الماتىدا كاسىپكەرلىك قىزمەتتى جۇزەگە اسىرۋ ءۇشىن ءتيىستى قۇجاتى جوق ازاماتتار مەديتسينالىق ماسكانى ۇستەمە باعامەن ساتقان كەزدە قولعا ءتۇستى.
قازاقستان رەسپۋبليكاسى پرەزيدەنتىنىڭ جانىنداعى توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ حاتتاماسى نەگىزىندە تاركىلەنگەن مەديتسينالىق بەتپەردەلەردىڭ بارلىعى دەرەۋ قالالىق قوعامدىق دەنساۋلىق باسقارماسىنا بەرىلدى.
تاركىلەنگەن 3 ميلليون بەتپەردە سانيتارلىق-ەپيدەميولوگيالىق شارالاردى كۇشەيتىلگەن رەجيمدە جۇزەگە اسىرىپ جاتقان قالاداعى بارلىق مەديتسينالىق ۇيىمدارعا ءبولىنىپ بەرىلەدى. 2 ميلليوننان استام مەديتسينالىق بەتپەردە قالالىق قوعامدىق دەنساۋلىق باسقارماسىنىڭ مەديتسينالىق قىزمەتكەرلەرىنە بەرىلدى.
بۇگىندە ولار پروۆيزورلىق ستاتسيونارلار مەن يزولياتورلاردا، سونداي-اق ءۇي ستاتسيونارىنداعى ادامدارعا مەديتسينالىق باقىلاۋ جۇرگىزىپ جاتىر. قالعان جەكە قورعانۋ قۇرالدارى ەپيدەميولوگتارعا، تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ، ىشكى ىستەر، ت ج، ۇلتتىق گۆارديا جانە تاعى باسقا دەپارتامەنت قىزمەتكەرلەرىنە ۇلەستىرىلدى.
سونىمەن قاتار، بەتپەردەلەر Open Almaty قوعامدىق قابىلداۋ بولمەسىنىڭ قىزمەتكەرلەرىنە دە تاراتىلدى. ويتكەنى ولار تاۋلىك بويى 1308 ءنومىرى بويىنشا تۇرعىندارعا بارلىق ماسەلەلەر جونىندە، سونىڭ ىشىندە كوروناۆيرۋستىق ينفەكتسيانىڭ تارالۋىنا قارسى ارەكەت بويىنشا كەڭەس بەرۋدە.
رەيدتىك ءىس-شارالار كەزىندە 16 توننا سپيرت تە تاركىلەندى. ستەريلدەۋ كەزىندە دەزينفەكتسيالاۋ قۇرالى رەتىندە پايدالانۋعا جارامدى بۇل سپيرت مەديتسينالىق ۇيىمدارعا ءبولىندى. جالپى قالا اكىمدىگى كوروناۆيرۋستىق ينفەكتسيانىڭ تارالۋىنا جول بەرمەۋ ءۇشىن بارلىق ءتيىستى جۇمىستاردى جالعاستىرۋدا.
كارانتيندى ەنگىزۋ تۋرالى شەشىمنەن كەيىن 27 بلوك-بەكەتتە كۇش قۇرىلىمدارى مەن مەديتسينالىق ۇيىم قىزمەتكەرلەرىنىڭ جۇمىسى جانداندى. قالادا COVID-2019 وشاعى انىقتالدى. ول ايماقتا دەزينفەكتسيالىق ءىس-شارالار جۇرگىزىلۋدە.
ماقسات - كوروناۆيرۋس ىندەتىنىڭ تارالۋ تىزبەگىن جويۋ. ءوز كەزەگىندە قالا بيلىگى قالا تۇرعىندارىن كارانتين رەجيمىن قاتاڭ ساقتاۋعا جانە اركىمدى مۇمكىندىگىنشە وقشاۋلانۋىنا شاقىردى.
سۇراقتار بويىنشا 1406 جانە Open Almaty 1308 نومىرلەرى بويىنشا تاۋلىك بويى جۇمىس ىستەيتىن call-ورتالىققا حابارلاسىڭىز.
كاتارالدى بەلگىلەرى بار ادامدار انىقتالعان جاعدايدا دەرەۋ قالانىڭ سانيتارلىق-ەپيدەميولوگيالىق قىزمەتىنىڭ تاۋلىك بويى جۇمىس ىستەيتىن 3823350 نومىرىنە حابارلاۋ كەرەك.