Facebook الەۋمەتتىك جەلىسىندە اۋلاداعى تۇرعىنداردىڭ ءانۇراندى قوسىلا شىرقاعان ۆيدەوسى تارادى. ۆيدەونى جەلىگە جۇكتەگەن ساۋلە قايسار اتتى قولدانۋشىنىڭ جازۋىنشا، بۇل - نۇر- سۇلتانداعى «مەرۋەرت» كەشەنىنىڭ تۇرعىندارى.
«مەن دە كوپتەگەن ەلوردالىقتار سياقتى ۇيدەن شىقپاي، قامالىپ وتىرعانمىن. ءبىر كەزدە سىرتتان كوتەرىڭكى داۋىستار مەن ىسقىرىق ەستىلدى. سويتسەم كورشىلەر بالكونعا شىعىپ، قوسىلىپ بىرگە ءان شىرقاپ، قولىنان كەلگەنشە ءبىر- بىرىنە قولداۋ كورسەتىپ جاتىر ەكەن. شىنىمدى ايتسام، كوڭىلىپ كوتەرىلىپ قالدى، ال ەكىنشى جاعىنان ءبىرتۇرلى مۇڭدى. ءبىز ءتورت قابىرعاعا قامالىپ وتىرمىز، قولىمىزدان كەلەتىنى - ءۇمىت ۇزبەي كۇتۋ عانا» ، - دەپ جازادى ۆيدەو اۆتورى.
ۆيدەودان تۇرعىنداردىڭ بىرىنەن ءبىرى ءىلىپ اكەتىپ، «مەنىڭ ەلىم، مەنىڭ ەلىم، گۇلىڭ بولىپ ەگىلەمىن، جىرىڭ بولىپ توگىلەمىن، ەلىم، تۋعان جەرىم مەنىڭ، قازاقستانىم» دەپ جاڭعىرعان داۋسىن ەستۋگە بولادى.