«كارانتين ەرەجەسىن ساقتاماعاندارعا اكىمشىلىك جانە قىلمىستىق جاۋاپكەرشىلىكتى قاتاڭداتۋ تۋرالى باستاما قارالۋدا. ناقتى قانداي سانكسيالار بولادى جانە ول قاشان كۇشىنە ەنەتىنىن ناقتى ايتا المايمىن. جاقىن كۇندەرى بۇل تۋرالى شەشىم قابىلدانادى. سانكسيالاردى كۇشەيتۋ كەرەك ەكەنىن، ءبىراق ءدال قازىرگى جاعدايدا شەشىم قابىلداۋ ءتيىمدى ەمەستىگىن ءبارىمىز ءتۇسىنۋىمىز قاجەت» ، - دەيدى ق ر ادىلەت ءمينيسترى مارات بەكەتايەۆ. سونداي- اق، ول الماتى قالاسىنىڭ ىشىندە قوزعالىسقا شەكتەۋ قويىلعانىنا قاتىستى ايتىپ ءوتتى.
«قالا ىشىندەگى قوزعالىسقا قاتىستى قوسىمشا شەكتەۋ تۋرالى ايتاتىن بولساق، الماتىدا كوروناۆيرۋس جاعدايلارى انىقتالعان تۇرعىن ۇيلەردەگى قوزعالىس شەكتەلگەنىن بىلەمىز. سىرتقا شىعۋعا تىيىم سالىنعان تۇرعىن ۇيلەردەن شىعىپ كەتكەندەر ءۇشىن قانداي شارا قولدانىلاتىنىن قازىر بولجاۋ مۇمكىن ەمەس. سەبەبى ناقتى قانداي ەرەجە بۇزۋشىلىق بولعانى انىقتالعان كەزدە عانا سانكسيا قابىلدانادى. ەرەجە بۇزۋدىڭ سالدارى قانداي بولعانىنا قاراي اكىمشىلىك ايىپپۇلدان باستاپ، قىلمىستىق جاۋاپكەرشىلىككە تارتىلادى. بەكىتىلگەن ەرەجەلەرگە جاۋاپكەرشىلىكپەن قاراۋدى سۇرايمىز. سەبەبى دۇكەنگە شىعىپ كەلۋىڭىزدىڭ ءوزى اينالاداعى ادامدارعا قاۋىپ ءتوندىرۋى مۇمكىن. ول ءسىزدىڭ قاۋىپسىزدىگىڭىز عانا ەمەس، اينالاڭىزداعى ادامداردىڭ دا قاۋىپسىزدىگىنە قاتىستى ماسەلە» ، - دەيدى ول.