الماتىدا كوروناۆيرۋس جۇقتىرعان ءبىر ادامنىڭ جاعدايى ورتاشا اۋىر - اكىمدىك

قالالىق قوعامدىق دەنساۋلىقتى ساقتاۋ باسقارماسىنىڭ باسشىسى تىلەۋحان ابىلدايەۆ ناۋقاستاردىڭ دەنساۋلىعى جايلى ايتتى، دەپ حابارلايدى قازاقپارات ءتىلشىسى.

«وزدەرىڭىزگە بەلگىلى، بۇگىن 19-ناۋقاس تىركەلدى. ول كراسنودار- ماسكەۋ- الماتى رەيسىمەن كەلگەن. بۇل ەل كارانتين ساناتىنا كىرمەگەن. الايدا ول الدىندا انىقتالعان ناۋقاس ايەلمەن بايلانىستا بولعان سوڭ پروۆيزورلىق ەمحانادا جاتقان بولاتىن. بۇگىن ودان الىنعان تەست وڭ ناتيجە بەردى. ول جۇقپالى اۋرۋلار اۋرۋحاناسىنا جاتقىزىلدى. قازىر بارلىعى 16 ادام قالالىق اۋرۋحانادا جاتىر، ال بالالار اۋرۋحاناسىندا - 2 بالا، ءبىر بالانىڭ اناسى جاتىر. 18 ادامنىڭ جاعدايى ءبىرقالىپتى، قاناعاتتانارلىق. ەشقايسىسىندا كاتارالدى قۇبىلىس جوق»، - دەدى ول.

باسقارما باسشىسىنىڭ ايتۋىنشا، ءبىر ادامنىڭ وكپەسىندە وبسترۋكتيۆتى وزگەرىستەر بولعان سوڭ جاعدايى ورتاشا دەپ باعالانىپ وتىر.

«بۇل ادامنىڭ وكپەسىندە بۇرىننان سوزىلمالى وبسترۋكتيۆتى وزگەرىستەر بار ەكەن. سوزىلمالى برونحيت دياگنوزى بار. سول ءۇشىن قازىر جوتەل مازالايدى دەپ شاعىم ايتادى. ءبىراق جاعدايى قازىر باقىلاۋدا»، - دەدى باسقارما باسشىسى. ونىڭ ايتۋىنشا، قازىر الماتىدا 608 ادام پروۆيزورلىق ەمحانادا جاتىر. 730 ادام ءۇي كارانتينىنە وقشاۋلانعان.