تۇركىستان وبلىسىنداعى ەمدەۋ مەكەمەلەرى كوروناۆيرۋس ينفەكتسياسىنا قارسى دايىندىقتارىن كۇشەيتتى

ەمدەۋ مەكەمەلەرى جاپپاي كارانتينگە كوشتى، دەپ حابارلايدى قازاقپارات ءتىلشىسى.

وڭىرلىك كوممۋنيكاتسيالار قىزمەتىندە وتكەن بريفينگتە تۇركىستان قالالىق ورتالىق اۋرۋحاناسىنىڭ باس دارىگەرى جانبولات دىلدابەكوۆ پەن كەنتاۋ قالالىق ورتالىق اۋرۋحاناسىنىڭ باس دارىگەرى گۇلبانۋ سىزدىقوۆا الەمدى دۇرلىكتىرگەن پاندەمياعا قاتىستى ساقتىق شارالارى تۋرالى مالىمدەدى.

اسا قاۋىپتى ينفەكتسيالىق ىندەتكە قارسى كۇرەس ماقساتىندا اۋرۋحانالاردىڭ اۋماعىنا جەدەل-جاردەم كولىكتەرىنەن باسقا جەكە اۆتوكولىكتەردىڭ كىرۋىنە تىيىم سالىنىپ، قاتاڭ قاداعالاۋعا الىنعان.

توتەنشە جاعدايدىڭ ەنگىزىلۋىنە بايلانىستى ناۋقاستارعا كەلۋشىلەردىڭ اۋرۋحانا ىشىنە كىرىۋىنە رۇقسات جوق. ال، ەمحانالار ءوز جۇمىس كەستەلەرىنە سايكەس، قىزمەت كورسەتۋدە.

«كەنتاۋ قالالىق اۋرۋحاناسىندا ناۋقاستاردى وقشاۋلاۋعا ارنالعان 50 توسەك ورىن بار. مەديتسينا قىزمەتكەرلەرىنىڭ بارلىعى دەرلىك ارنايى ءدارىس العان. بۇگىندە اۋرۋحانادا 75 دارىگەر، 240 ورتا بۋىن جانە 150 كىشى بۋىن مەديتسينالىق قىزمەتكەرلەرى جۇمىس ىستەۋدە. قاجەتتىلىك تۋىنداسا رەزەرۆتەگى دارىگەرلەر جۇمىلدىرىلادى»، - دەدى كەنتاۋ قالالىق اۋرۋحانانىڭ باس دارىگەرى گۇلبانۋ جۇماعالي قىزى.

ال، جانبولات بەردىباي ۇلى COVID-19 ينفەكتسياسىمەن كۇرەسكە تۇركىستان قالالىق اۋرۋحاناسىندا 60 دارىگەر جانە 150 ورتا بۋىن مەديتسينالىق قىزمەتكەرلەرى دايىن ەكەنىن اتاپ ءوتتى.

ينفەكتسيالىق ستاتسيوناردا 50 توسەك ورىن جاساقتالعانىن جەتكىزدى. سونداي-اق، اۋرۋحانا ۆيرۋسقا قارسى جانە دەنە قىزۋىن تۇسىرەتىن، قارقىندى تەراپيا ءۇشىن قاجەتتى پرەپاراتتار قورىمەن جانە قورعانىس كيىمدەرى، دەزينفەكتسيالىق زاتتارمەن قامتاماسىز ەتىلگەنىن تىلگە تيەك ەتتى.