بۇل تۋرالى نۇر- سۇلتان قالاسىنىڭ پوليسيا دەپارتامەنتىنىڭ باسشىسى ەرجان سادەنوۆ ايتىپ بەردى. «كارانتيندىك شارالاردى جۇزەگە اسىرۋعا تارتىلعان ىشكى ىستەر ورگاندارى قىزمەتىنە تۇسىنىستىك تانىتىپ، تالاپتارىن قاتاڭ ساقتاۋىڭىزدى سۇرايمىن. وسى ءساتتى پايدالانىپ، كوروناۆيرۋستىق ينفەكسيا تۋرالى جالعان اقپارات تاراتۋ جاۋاپكەرشىلىگى تۋرالى ەسكەرتكىم كەلەدى. توتەنشە جاعداي رەجيمى مەن كارانتيندى بۇزۋ قىلمىستىق جانە اكىمشىلىك جاۋاپكەرشىلىككە اكەپ سوعادى» ، - دەدى دەپارتامەنت باسشىسى ورتالىق كوممۋنيكاتسيالار قىزمەتىندە.
ونىڭ ايتۋىنشا، تۇرعىنداردى مازالاعان سۇراقتارعا جاۋاپ بەرەتىن ارنايى كولل- ورتالىق قۇرىلادى. ودان بولەك، 109, 101, 102, 103 قىزمەتتەرى جۇمىس ىستەيدى. بۇعان دەيىن كارانتين جاريالانعان نۇر- سۇلتان مەن الماتى قالالارىنا بلوك پوستتار قويىلىپ، كولىك پەن ازاماتتاردىڭ قوزعالىسى شەكتەلەتىنى حابارلانعان ەدى. قالاعا نۇر- سۇلتان مەن الماتىدا ءتيىستى تىركەۋدە تۇرعان ادامدار جانە قالالاردىڭ ومىرلىك قىزمەتتەرىن قامتاماسىز ەتۋگە قاجەت ادامدار عانا كىرەدى. ءتىزىمدى اكىمدىكتەر انىقتايدى .