الەۋمەتتىك ماڭىزى بار ازىق-تۇلىكتى يمپورتتاۋعا جەڭىلدىك رەتىندە «جاسىل ءدالىز» اشىلدى

نۇر-سۇلتان. قازاقپارات – ق ر قارجى مينيسترلىگىنىڭ مەملەكەتتىك كىرىستەر كوميتەتى ەلىمىزدە جاريالانعان توتەنشە جاعدايعا بايلانىستى، حالىق تۇتىناتىن الەۋمەتتىك ماڭىزى بار يمپورتتالاتىن ازىق-تۇلىكتەرگە «جاسىل ءدالىز» ورناتتى، دەپ حابارلايدى قازاقپارات كوميتەتتىڭ باسپا ءسوز قىزمەتىنە سىلتەمە جاساپ.

بۇل شارا - ءبىرىنشى كەزەكتە تۇتىناتىن تاۋارلار دەفيتسيتىن تۋدىرماۋ ءۇشىن جاسالۋدا. ۆەدومستۆونىڭ مالىمدەۋىنشە، 2019 -جىلدىڭ 1-قاڭتارىنان باستاپ قازاقستانعا جالپى قۇنى 554,6 ميلليون ا ق ش دوللارى تۇراتىن 872 مىڭ توننا تاۋار جەتكىزىلگەن.

اتاپ ايتقاندا، قانت - 165 مىڭ توننا ($55,9 ميلليون)؛ قۇس ەتى - 148 مىڭ توننا ($143 ميلليون)؛ پياز - 133 مىڭ توننا ($30,5 ميلليون)؛ ءسۇت - 118 مىڭ توننا ($56,8 ميلليون)؛ قىرىققابات- 85 مىڭ توننا ($24 ميلليون)؛ 78 مىڭ توننا ($14,6 ميلليون) ءسابىز سياقتى الەۋمەتتىك ماڭىزى بار ازىق-تۇلىك قاتارىنا جاتقىزىلعان 19 ءتۇرلى تاۋار يمپورتتالعان.

«قازىرگى تاڭدا ءبىرىنشى قاجەتتىلىك تاۋارلارىن تاسىمالدايتىن نەگىزگى كومپانيالارعا كەدەن تەكسەرۋى، ساراپتاما، جانە تاۋاردىڭ قۇنىن كەدەندىك باقىلاۋ سياقتى شارالار قولدانىلمايدى. سونداي-اق، قازىر شەكارادا وزگە ساناتتاعى بيزنەس سۋبەكتىلەرىنە اكىمشىلىك جۇكتەمەلەردى ازايتۋ ءۇشىن «قىزىل جانە سارى دالىزدەردىڭ» جۇمىسى قىسقارتىلعان»، دەلىنگەن حابارلامادا.