بۇل تۋرالى ق ر مەملەكەتتىك قىزمەت ىستەرى اگەنتتىگىنىڭ ءتورايىمى انار جايىلعانوۆا ايتتى، دەپ حابارلايدى قازاقپارات ءتىلشىسى.
«وسى كەزەڭدە ءبىزدىڭ وتانداستارىمىزدىڭ جايلىلىعى مەملەكەتتىك ورگاندارعا بايلانىستى. الايدا، ءقازىر مەملەكەتتىك مەكەمەلەردىڭ ۇزدىكسىز جۇمىس ىستەۋى ءۇشىن مەملەكەتتىك قىزمەتشىلەردىڭ دەنساۋلىعىن ساقتاۋعا كوڭىل ءبولۋ دە وتە ماڭىزدى. وسىعان بايلانىستى اعىمداعى جاعدايعا قاراماستان ءوز مىندەتتەرىن كۇندەلىكتى جانە ادال ورىنداپ جۇرگەن مەملەكەتتىك قىزمەتشىلەرگە ۇندەۋ جولداعىم كەلىپ وتىر»، - دەدى انار جايىلعانوۆا. وسى رەتتە اگەنتتىك ءتورايىمى مەملەكەتتىك قىزمەتشىلەرگە دۇنيەجۇزىلىك دەنساۋلىق ساقتاۋ ۇيىمىنىڭ جاڭا كوروناۆيرۋستىق ينفەكسياسىنىڭ الدىن الۋ جونىندەگى ۇسىنىمدارىن قاتاڭ ۇستاۋعا شاقىردى.
«گيگيەنا ەرەجەلەرىن ساقتاۋ ارىپتەستەرىڭىزدىڭ جانە ازاماتتارىمىزدىڭ اراسىندا COVID-19 تارالماۋىنا كومەكتەسەدى. قالىپتاسقان جاعداي كوروناۆيرۋستىق ينفەكسيانىڭ تارالۋ ءقاۋپىن تومەندەتۋگە مۇمكىندىك بەرەتىن قوسىمشا قاۋىپسىزدىك شارالارىن قابىلداۋدى تالاپ ەتەدى. وسىعان بايلانىستى مەملەكەتتىك ورگان باسشىلارىن مەملەكەتتىك قىزمەتشىلەردىڭ دەنساۋلىعىن جانە كۇندەلىكتى قىزمەتتەردى تولىققاندى ورىنداۋ قابىلەتىن بارىنشا ساقتاۋعا مۇمكىندىك بەرەتىن جاعداي جاساۋعا شاقىرامىز»، - دەدى ول.