قازاقستان مەن قىتاي اراسىنداعى سونداي ستانسيالاردىڭ ءبىرى - الماتى وبلىسىنىڭ پانفيلوۆ اۋدانىنداعى التىنكول بەكەتى. الايدا العاشقى كۇننەن باستاپ التىنكول ستانتسياسىنىڭ سانيتارلىق- كارانتيندىك قىزمەتى شەكاراداعى بىردە- ءبىر ادامدى تەكسەرىسسىز وتكىزبەي، جاعدايدى قاتاڭ باقىلاۋدا ۇستاپ كەلەدى.
التىنكول ستانسياسىنداعى سانيتارلىق- كارانتيندىك قىزمەت دەنساۋلىق ساقتاۋ مينيسترلىگىنىڭ تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتىنىڭ اۋماقتىق دەپارتامەنتىنە قارايدى. مۇنداعى سانيتارلىق- كارانتيندىك باقىلاۋ ءبولىمنىڭ باسشىسى عاليوللا نۋرۋللين بىرنەشە مامانمەن بىرگە كۇندىز- ءتۇنى دەمالىسسىز تەكسەرىس جۇمىستارىن جۇرگىزىپ كەلەدى ەكەن.
«قازىرگى ۋاقىتتا قازاقستان مەن قىتاي اراسىنداعى تەك لوكوموتيۆ بريگاداسىنىڭ مۇشەلەرى جۇك تاسىمالىن ورىنداپ ءجۇر. جۇك تاسىمالدانعان كەزدە لوكوموتيۆتىڭ ەكى قىزمەتكەرى عانا جۇرەدى. بۇرىن وسى قىزمەتكەرلەرمەن وقۋ- جاتتىعۋ جيىنىن وتكىزگەنبىز. قازىر بىردە- ءبىر جولاۋشى ارى نەمەسە بەرى وتە المايدى. تەك جۇك تاسىمالى بار. لوكوموتيۆ بريگاداسىنىڭ مۇشەلەرىن ءبىز بىردەن نەيترالدى اۋماققا اپارىپ، تەرمومەتريادان، ساۋالنامادان وتكىزەمىز. كەيدە كۇنىنە 8 ادام، كەيدە 30 ادامعا دەيىن تەكسەرىلەدى»، - دەيدى عاليوللا نۋرۋللين قازاقپارات تىلشىسىمەن تەلەفون ارقىلى بەرگەن سۇحباتىندا.
التىنكول ستانسياسىندا جۇمىس كۇندىز- ءتۇنى توقتامايدى. تاۋلىكتىك سانيتارلىق- ەپيدەميولوگيالىق تەكسەرىس كۇشەيتىلگەن. بارلىق بريگادا جۇمىس رەجىمىن قاتايتىپ، ءتىپتى قوسىمشا كومەك رەتىندە ءىس ساپارمەن كەلىپ، جۇمىس ىستەپ جاتقاندار بار. « ءبىزدىڭ ارقامىزعا ۇلكەن جاۋاپكەرشىلىك ارتىلعانىن ءتۇسىنىپ وتىرمىز. بەلگىلى ءبىر قيىندىقتارعا قاراماستان قولىمىزدان كەلگەن جۇمىستىڭ ءبارىن اتقارىپ كەلەمىز. باس سانيتارلىق دارىگەردىڭ قاۋلىسىنا سايكەس بىزگە جۇكتەلىپ وتىرعان مىندەتتەردىڭ ءبارى ورىندالۋدا. البەتتە ءبىزدىڭ جۇمىستىڭ بارىسىن كەيدە تۇسىنبەيتىن ادامدار دا كەزدەسەدى. الايدا جان- جاقتى اقپاراتتاندىرىپ، كوروناۆيرۋستىڭ ءقاۋپىن دۇرىستاپ تۇسىندىرگەننەن كەيىن ءتىل تابىسقانداي بولامىز»، - دەيدى عاليوللا نۋرۋللين.
بەكەتتىڭ ماماندارى باس مەملەكەتتىك سانيتارلىق دارىگەردىڭ قاۋلىسى شىعىپ، وعان وزگەرىس ەنگىزىلگەن سايىن جۇمىس رەجىمى كۇشەيتىپ، تالاپتى دا ارتتىرا باستايدى ەكەن.
«قاۋلىعا سايكەس جۇمىستى ورىنداۋ قيىن بولسا دا ەڭسەرىپ كەلەمىز. العاشقى كۇندەرى ستانسيادا تاۋلىك بويى جۇرگەن كەزدەر بولدى. قازىرگە دەيىن تىعىز بولسا دا ۇيىمداسقان جۇمىس رەتتەلىپ قالدى. وسىدان بارىپ ازداپ دەمالاتىن دا ۋاقىت تابىلدى. ەڭ باستىسى ەل امان بولسىن دەپ قانا تىلەپ وتىرمىز. اقپاراتتاردان ەلىمىزدە كوروناۆيرۋس جۇقتىرعانداردىڭ سانى كۇننەن- كۇنگە ارتىپ كەلە جاتقانىن ويلاپ تۋعاندارىڭ ءۇشىن، حالىق ءۇشىن الاڭدايسىڭ. ايتسە دە بۇنىڭ ءبىر قايىرى بولار. كوپشىلىك قوعام الدىندا ءوزىنىڭ جاۋاپكەرشىلىگىن تۇسىنسە ەكەن. سوندا عانا بۇل قيىندىقتى دا ەڭسەرەتىمىزگە سەنەمىن»، - دەپ ءتۇيدى عاليوللا نۋرۋللين.