بۇل تۋرالى «Qazaqstan» تەلەارناسىنداعى «اشىق الاڭ» باعدارلاماسىندا ق ر دەنساۋلىق ساقتاۋ مينيسترلىگىنىڭ رەسمي وكىلى دياس احمەتشارىپ ايتتى، دەپ حابارلايدى قازاقپارات ءتىلشىسى.
«توتەنشە جاعدايعا بايلانىستى دارىگەرلەردىڭ بارلىعى جۇمىلدىرىلدى. ياعني، كەزەك-كەزەكپەن جۇمىس ىستەيدى. مينيسترلىك تاراپىنا ولارعا كوپ جاعداي جاسالىپ جاتىر. ولار مايداننىڭ الدىڭعى شەبىندە جۇرگەندىكتەن جاعداي جاساۋ كەرەك. كۇن ءتارتىبى دە وزگەردى. ءتورت كەزەكتەن جۇمىس ىستەۋدە. نۇر- سۇلتان مەن الماتى قالالارىنا دارىگەرلەر شاقىرىلۋدا»، - دەدى دياس احمەتشارىپ.
ونىڭ اتاپ وتۋىنشە، وڭىرلەردە دارىگەرلەر جەتكىلىكتى. ۆيرۋس تاراعان كەزدە قالاي جۇمىس ىستەۋ كەرەكتىگىن بىلەدى.
«دارىگەرلەردىڭ بارلىعى - بىلىكتى ماماندار. سوعان قاراماستان كۇشەيتىپ جاتىرمىز. ازىرشە ەكى قالادا عانا انىقتالىپ وتىر. باسقا قازاقستاننىڭ قالالارىنا تارالماۋىن تىلەيمىز. مينيسترلىك تاراپىنان دارىگەرلەرگە تولىققاندى قولداۋ بار، ىنتالاندىرىپ جاتىرمىز. ءمينيستردىڭ قاۋلىسى بار. وسىنداي جاعدايدا جۇمىس ىستەپ جاتقان دارىگەرلەرگە 2-3 اي بويى جالاقىسىن 2-3 ەسە كوتەرۋ ماسەلەسى شتابتا قاراستىرىلىپ جاتىر»، - دەدى رەسمي وكىل.