بۇل سۇراققا نۇر-سۇلتان قالاسىنىڭ قالالىق ورتا ساپاسى جانە باقىلاۋ باسقارماسى باسشىسىنىڭ ورىنباسارى ەرلان سماعۇلوۆ جاۋاپ بەردى، دەپ حابارلايدى قازاقپارات ءتىلشىسى.
«مەيلى ۇيدە نەمەسە مەديتسينالىق مەكەمەدە بولسىن، كارانتيندە جاتقان بارلىق جۇمىسشىعا ۋاقىتشا جۇمىسقا جارامسىزدىق پاراعى بەرىلەدى. ۋاقىتشا جارامسىزدىق بويىنشا ەڭبەكاقى زاڭناماعا ساي بەرىلەدى. نۇر-سۇلتان قالاسىنىڭ اكىمدىگى توتەنشە جاعداي كەزىندە (15- ساۋىرگە دەيىن) جۇمىس بەرۋشىلەردىڭ بارىنە الەۋمەتتىك جاۋاپكەرشىلىك تانىتىپ، جۇمىسشىلاردى ۋاقىتشا قاشىقتان جۇمىس ىستەۋ تارتىبىنە اۋىستىرۋعا كەڭەس بەرەدى»، - دەدى ەرلان سماعۇلوۆ ەلوردا اكىمدىگىندە وتكەن ونلاين-فورماتتاعى باسپا ءسوز ءماسليحاتىندا.
ونىڭ ايتۋىنشا، تەحنولوگيالىق پروتسەستەر مەن وزگە دە سەبەپتەرگە بايلانىستى جۇمىسشىلار مىندەتتى تۇردە جۇمىسقا كەلۋى كەرەك بولسا، جۇمىس بەرۋشىلەر تولىق ەمەس جۇمىس كۇنىن بەلگىلەۋى كەرەك.
«ياعني بۇل ءبىر كۇندەگى جۇمىس ساعاتى مەن اپتاداعى جۇمىس كۇنىن ازايتۋعا بايلانىستى بولىپ وتىر. جۇمىس بارىسىندا جۇمىسشىلار بارلىق قورعانىس جابدىقتارىمەن قامتىلىپ، دەنساۋلىق ساقتاۋ ورگاندارىنىڭ كەڭەسىن ۇستانۋى ءتيىس»، - دەدى ول.