«17 - ناۋرىزدان باستاپ ازاماتتار ۇيىندە بولۋى كەرەك، سىرتقا تەك ازىق-تۇلىك الۋعا، دارىگەرگە قارالۋعا جانە جۇمىسقا بارۋ ءۇشىن عانا شىعۋ كەرەك»، - دەپ مالىمدەدى فرانسيا پرەزيدەنتى ەممانيۋەل ماكرون دۇيسەنبى كۇنگى تەلەۇندەۋىندە.
ول اتالعان شارالاردىڭ كەم دەگەندە 15 كۇنگە جالعاساتىنىن اتاپ ءوتتى.
بۇدان بولەك بيلىك قازىرگى بارلىق رەفورمانى توقتاتتى، ال مۋنيتسيالدى سايلاۋدىڭ ەكىنشى كەزەڭى كەيىنگە اۋىستىرىلدى. ەۋرووداق ىشكى شەكارالاردى 17 - ناۋرىزدان باستاپ جاباتىنىن حابارلادى ەممانيۋەل ماكرون.
بىرنەشە ساعات بۇرىن ەۋروكوميسسيا ءتواراعاسى ۋرسۋلا فون دەر ليايەن (Ursula von der Leyen) جاڭا كوروناۆيرۋستىڭ تارالۋىنا بايلانىستى ە و اۋماعىنا كىرۋگە ۋاقىتشا تىيىم سالۋ تۋرالى ۇسىنىس جاساعان بولاتىن.
ەسكە سالا كەتەيىك، COVID-19 كوروناۆيرۋسى 2019-جىلدىڭ سوڭىندا قىتايدىڭ حۋبەي پروۆينتسياسىندا پايدا بولعان. سودان بەرى بۇل ىندەت 160 تان استام ەلگە تارادى. الەم بويىنشا ۆيرۋس جۇقتىرعان 180 مىڭنان استام جاعداي انىقتالعان، 7 مىڭعا جۋىق ادام كوز جۇمعان، 78 مىڭ ناۋقاس جازىلىپ شىققان.
ۆيرۋستان كوز جۇمعاندار سانى بويىنشا كوش باستاپ تۇرعان ەلدەر: قىتاي، يتاليا جانە يران.
د د س ۇ ەۋروپانى جاڭا اۋرۋدىڭ پاندەميا وشاعى دەپ جاريالادى. فرانسيادا 6633 ادام كورواۆيرۋس جۇقتىرعانى انىقتالدى، ونىڭ 148 ءى قايتىس بولدى.
ەسكە سالا كەتسەك، فرانسيادا 13- ناۋرىزدا مەكتەپتەر، ۋنيۆەرسيتەتتەر مەن بالاباقشالار جابىلعان بولاتىن.