مامانداردىڭ ءبىر دە ءبىرى كوروناۆيرۋستان قورقىپ، جۇمىستان بۇققان ەمەس - داريا ازىمبايەۆا

نۇر- سۇلتان. قازاقپارات - ەلورداعا ۇشىپ كەلەتىن ءاربىر حالىقارالىق رەيستى كۇتىپ الىپ، ازاماتتاردى ءجىتى تەكسەرىپ، كوروناۆيرۋسپەن كۇرەستە الدىڭعى قاتاردا جۇرگەندەردىڭ ءبىرى - داريا ازىمبايەۆا.

قالالىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى سانيتارلىق كارانتيندىك ءبولىمىنىڭ باسشىسى قازاقپارات تىلشىسىمەن سۇحباتتا ەلىمىزدە قاۋىپتى ۆيرۋستىڭ تارالۋىنا جول بەرمەۋ ءۇشىن قانداي جۇمىس جۇرگىزىلىپ جاتقانىن ايتىپ بەردى.

«قىتايدا كوروناۆيرۋس ينفەكسياسى بويىنشا جاعداي ۋشىققالى بەرى سانيتارلىق كارانتيندىك پۋنكت ماماندارى كۇشەيتىلگەن رەجىمدە جۇمىس اتقارىپ جاتىر. ءوزىم نۇر- سۇلتان قالالىق سانيتارلىق- كارانتيندىك پۋنكتىڭ باسشىسى بولعاننان كەيىن قازاقستانداعى بۇكىل اۋەجايلار مەنىڭ قاراماعىما ەنەدى. اۋەجايلاردىڭ بارىندە تەكسەرىس كۇشەيتىلدى. 26 - اقپاننان باستاپ بورتقا كىرىپ، كىسىلەردىڭ تەمپەراتۋراسىن ولشەپ، تەكسەرىپ كەلەمىز. باس مەملەكەتتىك سانيتارلىق دارىگەردىڭ ەكىنشى قاۋلىسىنا سايكەس، ءبىز ولارعا انكەتالاۋ جۇرگىزەمىز. وسىلايشا سانيتارلىق باقىلاۋ بىتكەننەن كەيىن عانا جولاۋشىلار ۇشاقتان تۇسەدى»، - دەيدى داريا ازىمبايەۆا.

سانيتارلىق كارانتيندىك باقىلاۋ ءبولىمىنىڭ باسشىسى وسىدان كەيىن ۇشاقتان تۇسكەن ازاماتتار پاسپورتتىق باقىلاۋعا وتەتىنىن ايتادى. ول جەردە كەدەن قىزمەتكەرلەرى ازاماتتاردى مەملەكەتتەردىڭ ساناتتارى (قازاقستان كوروناۆيرۋس قاۋپى بويىنشا بەكىتكەن) بويىنشا ءتولقۇجاتىنىڭ شتامپتارىن قاراپ، جولاۋشى يران، يتاليادان بولسا بىردەن وقشاۋلانادى.

«بىزدە ءبىر كەزەكشىلىك كەزىندە 5-6 ادامنان شىعادى. ۋحاننان نەمەسە بەيجىڭنەن، توكيودان (لاينەردە بولعان ازاماتتار كەلگەن كەزدە) كەلەتىن ارنايى رەيستەر دە بولدى. مۇنداي كەزدە دە ماماندارىمىزدىڭ وزدەرى بورتقا شىعىپ، قارسى الدىق. اۋەجايلاردىڭ بارىنە حات جىبەرىپ، بورتسەرىكتەر اۋە ساپارى كەزىندە دە جولاۋشىلاردىڭ جاعدايىن باقىلاپ، انكەتا تولتىرتۋ كەرەكتىگىن ەسكەرتتىك. ەگەر جولاۋشىنىڭ قىزۋى كوتەرىلىپ، ءدارى- دارمەك سۇراسا ءبىز بورتقا قوسىمشا قىزمەتكەرلەردى جىبەرىپ، ءتيىستى الگوريتمگە ساي ارەكەت ەتەمىز»، - دەيدى ول.

قالالىق كولىكتەگى تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ دەپارتامەنتى كەدەنشىلەرمەن دە، شەكاراشىلارمەن دە جۇمىستى كۇشەيتكەن. ءبىر وكىنىشتىسى، شەتەلدەن ۇشىپ كەلگەن وتانداستارىمىزدىڭ كەيبىرى انكەتانى دۇرىس تولتىرماي، كەيدە ءتىپتى مۇلدە تولتىرماي كەتەتىن كورىنەدى.

«ءبىز ۇشاقتى كۇتىپ العان كەزدە بورتسەرىك حالىقارالىق مەديتسينالىق- سانيتارلىق ەرەجە بويىنشا بىزگە مانيفەست پەن دەكلاراتسيانى بەرەدى. وندا كەلگەن ادامداردىڭ ءبارىنىڭ اتى- ءجونى جازىلىپ تۇرادى. كەيبىر كىسىلەر قازىر «تەزىرەك اۋەجايدان شىعىپ كەتۋ ءۇشىن وتىرىك اتتى جازا سالامىز» دەپ ءجۇر. ولاي بولمايدى! سەبەبى ءبىز ءبارىن مانيفەستپەن تەكسەرىپ وتىرمىز. شەكاراشىلار ادامداردىڭ ج س ن ءنومىرىن، ءتولقۇجات مالىمەتىنىڭ ءبارىن بەرەدى بىزگە. جەلىلىك پوليتسياعا حابارلاسساق، ولار ساناۋلى سەكۋند ىشىندە ول كىسىنىڭ مەكەنجايىن تاۋىپ بەرەدى. سول سەبەپتى بورتپەن ۇشىپ كەلگەندەردى ءبولىپ، كوروناۆيرۋس قاۋپىنە بايلانىستى بولىنگەن مەملەكەتتەردىڭ ساناتتارىنا كىرگىزەمىز. ماسەلەن، سەۋلدەن كەلگەندەر بىردەن كارانتينگە بارادى. سەۋلدەن كەلگەندەردىڭ ءبارىنىڭ مەكەنجايىن، تەلەفونىن الىپ، اۋماقتىق دەپارتامەنتتەرگە باقىلاۋ جۇرگىزۋ ءۇشىن جىبەرەمىز. كەيبىر وتانداسىمىز ترانزيتپەن باسقا ەلگە ۇشامىن دەپ، الداپ، اۋەجايدان شىعىپ كەتكىسى كەلەدى. ءبىراق وعان دا توسقاۋىل قويىلىپ جاتىر»، - دەدى ول.

داريا ازىمبايەۆا دەپارتامەنت ماماندارى قازىرگى تاڭدا ءتورت اۋىسىم بويىنشا جۇمىستا جۇرگەنىن جەتكىزدى. بۇكىل حالىقارالىق رەيس تاڭعا جۋىق كەلەتىندىكتەن، ماماندار تۇنىمەن سول رەيستەردى كۇتىپ الادى.

«تۇنگى ساعات 00.00-دەن تاڭەرتەڭگى 07.00-گە دەيىن رەيستەر 15-20 مينۋت ارالىعىمەن كەلىپ جاتادى. الماتى قالاسىنا ءبىر تاۋلىكتە 40-45 رەيس، ەلورداعا 25-30 رەيس كەلەدى. ءوزىم ەكى ايدان بەرى، 25 - قاڭتاردان باستاپ ءبىر كۇن دە دەمالعان ەمەسپىن. ۇيگە كەلەمىز - 4-5 ساعاتتىق ۇيقىدان كەيىن تاڭعى ساعات جەتىدە كولىك الىپ كەتەدى. تۇنگى ساعات 23.00-00.00 دەگەندە قايتامىز جۇمىستان. ۇيىمداستىرۋشىلىق جۇمىسپەن اينالىساتىن ءبىزدىڭ جۇمىس كەستەمىز وسىنداي بولىپ كەتتى. ال ءبىر كۇن ءبىر ءتۇن جۇمىس ىستەگەننەن كەيىن ماماندارىمدى اراسىندا ءبىر ءتۇن دەمالدىرىپ الۋعا تىرىسامىن. ەرتەڭىندە كۇندىز قايتا جۇمىسقا كەلگەن ولار انكەتالاردى قايتا اقتارىپ، قىزۋ جۇمىسقا كىرىسىپ كەتەدى»، - دەدى داريا ازىمبايەۆا.

قاۋىپتى ساناتتاعى مەملەكەتتەن، ماسەلەن يتاليادان كەلگەن ازاماتتار ماسكەۋ ارقىلى ۇشىپ جەتۋى مۇمكىن.

«ادامدار ءارتۇرلى. تۇسىنگەن ادامدار ءبارىن انىق جازىپ بەرەدى. ال كەيبىر ادام جازباي كەتەدى. ونى شەكاراشىلار بىزگە ءتولقۇجاتتارىن قاراپ، ءبارىبىر انىقتاپ الامىز. ءبىر جاقسىسى، سول قىزمەتتەرمەن وتە جاقسى جۇمىس ىستەپ جاتىرمىز. ويتكەنى كوروناۆيرۋس ينفەكسياسىن وسى ۋاقىتقا دەيىن كىرگىزبەۋىمىزدىڭ سەبەبى - ماماندارىمىزدىڭ، ءارتۇرلى سالاداعى قىزمەتكەرلەردىڭ ءجىتى نازارداعى جۇمىسى دەپ ويلايمىن»، - دەيدى ءبولىم باسشىسى.

داريا ازىمبايەۆا وزىنە قاراستى مامانداردىڭ ءبارى ماسكامەن، قولعاپپەن جۇمىس ىستەيتىنىن ايتىپ ءوتتى.

«ماماندارىمىزدىڭ ءبىرى دە وسى ۋاقىتقا دەيىن كوروناۆيرۋستى ءوزىمىز جۇقتىرىپ الامىز دەپ، جۇمىستان بۇعىپ قالعان ەمەس. پاتريوتيزمدەرى شىعار. كۇنى- ءتۇنى جۇگىرىپ، جۇمىستارىن ادال اتقارىپ جاتىر. بىلايعىلاردان بولەك، چارتەرلىك رەيستەر دە بار عوي. ونىڭ ءبارىن نازاردان تىس قالدىرمايمىز. كەشە ۋاقىت تاۋىپ الەۋمەتتىك جەلىنى شولىپ وتىرسام، قولدانۋشىلاردىڭ ءبىرى ەكىنشىسىنە «تايلاندتا بولعانىڭدى ايتپا» دەپ اقىل ايتىپ جاتىر. كۇلدىم دە قويدىم. وتىرىك ەسىمىڭدى جازعانىڭمەن قولىمىزدا مانيفەست بار عوي. وتىرىك اتىن جازسا دا ءبىز ونى تاۋىپ الامىز. تاعى ءبىرى «تەپلوۆيزورى ىستەمەيدى دە» دەپ جازىپتى. كەشە ۆارشاۆادان تەپلوۆيزورمەن باقىلاپ، كەلگەندەردى ءبىر ەمەس، بەس ادام قارسى الدىق. ۆيدەوكامەرانىڭ ءبارى بۇل ءسوزىمىزدى راستاي الادى. ءبىزدىڭ ماماندار بارلىق رەيستى باقىلاۋعا العان»، - دەيدى ول.

شەتەلدەن ۇشىپ كەلگەن ادامداردىڭ ىشىندە كۇنىنە شامامەن 20 شاقتى ادام اۋرۋحاناعا جەتكىزىلەدى ەكەن. داريا ازىمبايەۆا كەيبىر قۋلىعى بار ادامداردىڭ دا بار ەكەنىن دە ايتىپ قالدى.

«كەيبىر ادامدار يتاليادان ماسكەۋگە ۇشىپ كەلەدى دە، ودان بەرى كەلگەن كەزدە جەكە كۋالىگىن كورسەتە سالادى. ول ادام انكەتاسىندا يتاليادا بولدىم دەپ جازباي قويۋى مۇمكىن. كەشە سەۋلدەن كەلگەن رەيستى كۇتىپ الدىم. جانداربەك مۇحتار ۇلى دا بىزبەن بىرگە رەيستەردى كۇتىپ الىپ، ءبىزدىڭ ماماندارمەن بىرگە ءجۇر. ءبىر سوزبەن كوپشىلىك ءبىزدىڭ جۇمىسىمىزعا تۇسىنىستىكپەن قاراسا دەيمىز. سەبەبى بىزگە ەڭ الدىمەن حالىقتىڭ اماندىعى كەرەك»، - دەيدى ول.

اۆتور: ايان بەكەن ۇلى