بۇگىن كەيبىر دەپوزيتتەر بويىنشا ەڭ جوعارى مولشەرلەمەلەردىڭ ءمانى قايتا قارالدى، دەپ حابارلايدى قازاقپارات قوردىڭ باسپا ءسوز قىزمەتىنە سىلتەمە جاساپ.
وزگەرىستەر بۇگىن كۇشىنە ەنەدى: بانكتەر ەندى دەپوزيتتەردى ەداۋىر جوعارى مولشەرلەمەلەرمەن قابىلداۋعا قۇقىلى.
ۇسىنىلعان ەڭ جوعارى سىياقى مولشەرلەمەلەرىن قايتا قاراۋ - اقشا نارىعىنداعى شارتتاردىڭ وزگەرۋىنە بەرىلگەن بارابار جاۋاپ. ەسكە سالامىز، بازالىق مولشەرلەمە 9,25 پايىزدان 12 پايىزعا كوتەرىلىپ، ونىڭ پايىزدىق ءدالىزى /- 0,5 پايىزدىق تارماققا كەڭەيتىلگەن بولاتىن.
«ۇزاق مەرزىمدى جيناق سالىمدار ەڭ جوعارى تابىستى سالىمدار بولىپ قالا بەرەدى. ءبىر جىل مەرزىمگە اشىلعان جانە تولىقتىرىلمايتىن جيناق سالىمدار بويىنشا ۇسىنىلعان ەڭ جوعارى مولشەرلەمە 15,1 پايىزعا ، ەكى جىل مەرزىم بويىنشا - 15,5 پايىزعا وسەدى. بۇل بۇعان دەيىنگى ماندەردەن 1 پايىزدىق تارماققا جوعارى. جيناق سالىمدارعا دەگەن سۇرانىس باسەڭدەگەن جوق. كەرىسىنشە اقشانىڭ قۇنى وزگەرىپ جاتقان جاعدايدا بۇل سالىمدار ەداۋىر جوعارى تابىس اكەلەدى. ونىڭ ۇستىنە اتالمىش سالىمدار ق د ك ب ق تاراپىنان قورعالادى» دەلىنگەن حابارلامادا.
تولىقتىرۋعا جانە كەز كەلگەن ۋاقىتتا الۋعا بولاتىن مەرزىمسىز سالىمدار - بۇل جالپى بۇقارالىق ءونىم - مۇنداي دەپوزيتتەر بارلىق بانكتەردىڭ دەپوزيتتەر جەلىسىندە بار. وتكەن اپتادا مەرزىمسىز سالىمدار بويىنشا ۇسىنىلعان ەڭ جوعارى مولشەرلەمەردىڭ ءمانى قايتا قارالعان سوڭ، وعان قوسا بازالىق مولشەرلەمەنىڭ پايىزدىق ءدالىزىنىڭ كەڭەيتىلۋىنە بايلانىستى ق د ك ب ق بۇگىن بازالىق مولشەرلەمەنىڭ سپرەدىن 0,5-تەن 1 پايىزدىق تارماققا ۇلعايتتى. بانكتەر بۇگىننەن باستاپ-اق مەرزىمسىز سالىمداردى 13 پايىزعا دەيىنگى مولشەرلەمەمەن قابىلداۋعا قۇقىلى.
«ءۇش جانە التى ايلىق قىسقا مەرزىمدى جيناق سالىمدار ق د ك ب ق- نىڭ بازالىق مولشەرلەمەدەن تىس سپرەدتى 1-دەن 2 پايىزدىق تارماققا دەيىن ءوسىرۋ تۋرالى شەشىمىنىڭ ارقاسىندا ەداۋىر جوعارى تابىستى سالىمدارعا اينالادى. بۇگىننەن باستاپ 3 جانە 6 ايلىق جيناق دەپوزيتتەر بويىنشا مولشەرلەمەلەردىڭ ەڭ جوعارى ءمانى - 14,0 پايىزدى قۇرايدى. ق د ك ب ق مەرزىمدى سالىمدار بويىنشا مولشەرلەمەلەردىڭ ەڭ جوعارى ءمانىن وزگەرىسسىز، ياعني، 10- ناۋرىزدا بەكىتىلگەن دەڭگەيدە قالدىردى» دەپ ءمالىم ەتتى قوردىڭ باسپا ءسوز قىزمەتى.
الايدا مىنا مەرزىمدى دەپوزيتتەر بويىنشا ۇسىنىلعان ەڭ جوعارى مولشەرلەمەلەردى، دالىرەك: ءبىر جىلعا اشىلعان دەپوزيتتەر بويىنشا - 12,2 پايىزعا ، ەكى جىلعا - 12,9 پايىزعا دەيىن ءوسىردى.
«ق د ك ب ق ارەكەتى نارىقتىق ادىستەمەگە نەگىزدەلەدى جانە ءبىرىنشى كەزەكتە قازاقستاندىق سالىمشىلاردىڭ مۇددەلەرىن قورعاۋعا جانە سالىمداردى سارالاۋدىڭ نەگىزگى قاعيداسىن ساقتاۋعا باعىتتالعان: بارلىق دەپوزيتتەر ينفلياتسيادان جوعارى تابىس اكەلەدى، ال مەرزىمىنەن بۇرىن الۋعا قاتىستى ەڭ جوعارى تالاپتارعا يە جيناق سالىمدار ەداۋىر جوعارى تابىستىلىق اكەلەدى»، - دەپ ءتۇسىندىردى قازاقستاننىڭ دەپوزيتتەرگە كەپىلدىك بەرۋ قورى ءتوراعاسىنىڭ مىندەتىن اتقارۋشى بوتا اقبايەۆا.