كوروناۆيرۋستىڭ الدىن الۋ مەن قارسى تۇرۋ جونىندەگى وڭىرلىك شتاب وكىلدەرى الماتىدا زەرتحانالىق دەڭگەيدە راستالعان كوروناۆيرۋس ينفەكسياسىن جۇقتىرۋدىڭ 7 جاعدايى تىركەلگەندىگىن جەتكىزدى.
قازىرگى تاڭدا قالالىق قىزمەت وكىلدەرى ارنايى بەكىتىلگەن «ب» جوسپارىنا سايكەس، سانتيرالىق- ەپيدەميولوگيالىق ءىس-شارالاردى جۇزەگە اسىرۋدا. بۇل رەتتە ۆيرۋس جۇقتىرعاندار مەن ولارمەن بايلانىستا بولعاندار تۋرالى تولىققاندى مالىمەتتەر الۋ، ولاردى ۋاقىتىندا وقشاۋلاۋ قالادا كوروناۆيرۋستىق ينفەكسيانىڭ تارالۋىنىڭ ادىن الۋ باعىتىنداعى باستى ءىس-شارالاردىڭ ءبىرى بولىپ تابىلادى. وسى شارالاردى جۇزەگە اسىرۋ بارىسىندا ازاماتتار تاراپىنان اۋرۋحاناعا جاتۋدان باس تارتۋ، وزىمەن بايلانىستا بولعان ادامدار تۋرالى مالىمەتتەردى جاسىرۋ جاعدايلارى جيىلەپ كەتكەندىگى بايقالدى.
وسى رەتتە ولار ق ر «حالىقتىڭ دەنساۋلىعى مەن دەنساۋلىق ساقتاۋ جۇيەسى تۋرالى» زاڭىنىڭ 90-بابىنا سايكەس، ازاماتتار: وزدەرىنىڭ جانە اينالاسىنداعىلاردىڭ دەنساۋلىعىن ساقتاۋ شارالارىن جاۋاپكەرشىلىكپەن قاراپ، مەديتسينالىق مەكەمەلەردىڭ تالاپ ەتۋى بويىنشا تەكسەرۋدەن ءوتىپ، ەمدەلىپ، دارىگەرلەرگە ءوزىنىڭ ينفەكسيالىق اۋرۋلار مەن اينالاسىنداعىلارعا قاۋىپ توندىرەتىن وزگە دە اۋرۋلارمەن ناۋقاس ەكەنىنەن حاباردار ەتۋى كەرەكتىگىن ەسكەرتتى. ال اينالاسىنداعىلارعا قاۋىپ توندىرەتىن اۋرۋمەن اۋىراتىندار مەديتسينالىق تەكسەرۋ مەن ەمدەۋدەن باس تارتقان جاعدايدا ولار قازاقستان زاڭدارىنا سايكەس ءماجبۇرلى تۇردە تەكسەرىلىپ، ەمدەلەدى.
ال ەگەر اينالاسىنا قاۋىپ توندىرەتىن اۋرۋمەن اۋىراتىن ازاماتتار جانە ونىمەن بايلانىستا بولعان سونداي-اق سونىڭ سالدارىنان پروفيلاكتيكالىق ەمدەۋدى قاجەت ەتەتىن ادامدار، سونىمەن قاتار اينالاسىنا قاۋىپ توندىرەتىن اۋرۋمەن اۋىراتىنىن جاسىرعاندار، ۆيرۋس وشاعى مەن ناۋقاسپەن بايلانىستا بولعانداردى جاسىرۋ ارەكەتتەرى زاڭمەن قۋدالانادى.
مىسالى ادامداردىڭ ءومىرى مەن دەنساۋلىقتارىنا قاۋىپ تۋدىراتىن اقپاراتتاردى جاسىرۋ ق ر ق ك-نىڭ 305-بابى بويىنشا قىلمىستىق جاۋاپكەرشىلىكتى قاراستىرادى. وسىعان قاراي الماتى اكىمدىگى ازاماتتارعا ءوز ارەكەتتەرىنە جاۋاپكەرشىلىكپەن قاراپ، سانيتارلىق- گيگيەنالىق ءتارتىپتى ساقتاپ، اۋرۋدىڭ سيمپتومدارى انىقتالعان جاعدايدا ءوزىن-ءوزى وقشاۋلاۋ قاجەتتىگىن ەسكەرتتى.
اۆتور: ايدار وسپاناليەۆ