كۇللى الەم كوروناۆيرۋسپەن كۇلە ءجۇرىپ كۇرەسە باستادى
الەمنىڭ تۇكپىر- تۇكپىرىنەن ۇرەيلى ستاتيستيكالار كەلىپ جاتقانىمەن، كەي حالىق بۇل قيىندىققا مويىمايتىنىن ەرەكشە جولمەن كورسەتىپ كەلەدى. ماسەلەن كوروناۆيرۋس قاۋپى جاعىنان ەڭ جوعارى ساناتقا ەنگەن يتاليادان بالكوندا ءان شىرقاعان ازاماتتاردىڭ ۆيدەوسى تاراپ كەتتى. ساۋلەتى مەن داۋلەتى جاراسقان مەملەكەتتىڭ ازاماتتارى ءوز حالقىن دا، الەم ەلدەرىن دە وسىلاي جىگەرلەندىرىپ جاتقانداي. بالكوندا ءان شىرقاۋ - يتاليادا بۇگىن دە فلەشموبقا اينالىپ، حالىقتىڭ ءوزى باستاپ كەتكەن اكسياعا مىڭداعان ازامات اتسالىسۋدا.
ءان دەمەكشى يتاليالىقتارداي ءبىزدىڭ ەلدىڭ دە ونەرپازدارى دا «كوروناۆيرۋس كەت، كەت» دەپ ءان شىرقاپ، كوپتىڭ كوڭىلىن كوتەرىپ ءجۇر.
ءبىر قىزىعى، وسى ءاندى شىرقاپ باستاعان ەلىمىزگە بەلگىلى ءانشى مارات وماروۆتىڭ باستاماسىن وزگە جۇلدىزدار دا قولداپ كەتىپتى. قاۋىپتى كەسەل جايلى كوڭىلدى ءاننىڭ رەميكسى دە شىعىپ قويعان ەكەن. انمەن بىرگە بيمەن دە كوپتىڭ كوڭىلىن اۋلاعاندار بار.
ەستەرىڭىزدە بولسا قىتايداعى قانداسىمىز - شىڭجاڭنان ۋحانعا كومەككە بارعان تاجىريبەلى دارىگەر- حيرۋرگ باھارگۇل تولقىن قىزى كوروناۆيرۋستان ەمدەلىپ جاتقان ناۋقاستارعا قازاقتىڭ «قارا جورعا» ءبيىن بيلەپ بەرگەن ەدى. وسى مادەني شارانى تاماشالاعان ادامدار «قارا جورعا» ءبيىن تۇڭعىش كورگەندەرىن جانە ەرەكشە بيدەن ۇلكەن اسەر العاندارىن ايتىپ، العىستارىن بىلدىرگەن.
ال يسپانيا استاناسى مادريدتە تۇرعىندار مەديتسينالىق قىزمەتكەرلەرگە ۇزاعىنان قول شاپالاقتاپ، ۇلكەن قولداۋ ءبىلدىرىپتى. بالكوندارىنان شىعىپ، «براۆو» دەپ ايعايلاعان حالىق اق حالاتتى ابزال جاندارعا العىستارىن وسىلاي ءبىلدىرىپتى.
مىنە الەم حالقى وسىلايشا بۇل قيىندىقتى دا ەڭسەرىپ كەلەدى.
اۆتور: ايان بەكەن ۇلى