كومپانيا باسپا ءسوز قىزمەتىنىڭ مالىمەتىنشە، قاڭتار ايىنان باستاپ كوروناۆيرۋستىڭ الدىن الۋ جونىندەگى ەرتەرەك ارەكەت ەتۋ شارالارى قابىلدانعان. سونىمەن قاتار، 2020 -جىلدىڭ 1 - اقپانىنان باستاپ دوستىق ستانساسىنا دەيىن «الماتى - ءۇرىمجى» جانە «نۇر- سۇلتان - ءۇرىمجى» جولاۋشىلار پويىزىنىڭ ءجۇرۋ باعىتتارى قىسقارتىلعان.
«جولاۋشى پويىزىندا كوروناۆيرۋستىڭ الدىن الۋ جونىندەگى بارلىق جۇرگىزىلىپ جاتقان ءىس- شارالار دەنساۋلىق ساقتاۋ سالاسىنىڭ ۋاكىلەتتى ورگانى (د س م تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى) تالاپتارىنا سايكەس قاتاڭ تۇردە جۇرگىزىلۋدە.
نۇر- سۇلتان قالاسى بويىنشا د س م تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىمەن بىرلەسە جولاۋشىدان نەمەسە پەرسونالدان كوروناۆيرۋس كۇدىگى بايقالعان كەزدە پويىز بريگاداسىنىڭ ءىس- ارەكەتىن رەگلامەنتتەيتىن نۇسقاما ازىرلەندى» ، دەلىنگەن حابارلامادا.
رەيستىڭ الدىندا پويىز بريگادالارى تۇراقتى تۇردە نۇسقاۋلىق وتكىزەدى. ۆاگونعا وتىرعىزار الدىندا جولسەرىك جولاۋشىلاردىڭ كوروناۆيرۋس ىندەتى تاراعان ەلدەردە بولعان- بولماعانى جونىنەن سۇراپ حاباردار بولۋى كەرەك. ونداي جولاۋشىلار انىقتالعان جاعدايدا انكەتا تولتىرىلادى جانە اقپارات ارى قاراي شارالار قابىلداۋ ءۇشىن «جولاۋشىلار تاسىمالى» ا ق ورتالىق اپپاراتىنا جىبەرىلەدى.
«ساپار بارىسىندا پويىز بريگاداسى قىزمەتكەرىندە نەمەسە جولاۋشىدا كوروناۆيرۋس بەلگىسى انىقتالعان جاعدايدا پويىز باسشىسى الگى جولاۋشىنى وزگە جولاۋشىلاردان وقشاۋلاۋى جانە پويىز ءماشينيسىن حاباردار ەتۋى ءتيىس. ۆاگونداردىڭ اينالىمى جانە كەلۋ پۋنكتەرىندە باكتەريا مەن ۆيرۋستارعا قارسى زارارسىزداندىرۋ جۇمىسى تۇراقتى جۇرگىزىلۋدە. قابىرعا، توبە، ەدەن، ۇستەل، ديۆان جانە تەرەزە دەزينفەكسيالانادى. ول سانيتارلىق ەرەجە تالاپتارىنا جۇرگىزىلەدى. سونداي- اق جولاۋشىلار پويىزى اينالىمى پۋنكتەرىندە قوقىس جاشىكتەرى مەن دارەتحانانى زارارسىزداندىرۋ قولعا الىنعان» ، دەلىنگەن حابارلامادا.
«جولاۋشىلار تاسىمالى» ا ق جولاۋشىلار پويىزدارىندا كەلەسىدەي ساقتىق شارالارىن قابىلداعان:
- ۆاگونداردا جولاۋشىلار ءۇشىن كورنەكى اقپارات جانە جادىناما، فيرمالىق جانە كوممەرتسيالىق پويىزداردىڭ مۋلتيمەديالىق پورتالدارىندا كوروناۆيرۋستىڭ الدىن الۋ جونىندەگى بەينەروليكتەر ورنالاستىرىلعان.
ساپار كەزىندە زارارسىزداندىرۋ قۇرالدارىن قولدانا وتىرىپ 4 رەتتەن كەم ەمەس ىلعالدى تازارتۋ جۇرگىزىلەدى. پويىزدار اۋرۋ انىقتالعان جاعدايدا زارارسىزداندىرۋ قۇرالدارى، مەديتسينالىق ماسكالار جانە وزگەلەرى (شۇبەرەك، شەلەك، ەسەپكە الۋ داپتەرى) قاراستىرىلعان.
سونىمەن قاتار «ق ت ج» ۇ ك» ا ق قازاقستان تەمىرجول ۆوكزالدارىندا كوروناۆيرۋس تارالۋىنىڭ الدىن الۋدا جانە قاۋىپسىزدىك شارالارىن قابىلداۋدا.
نۇر - سۇلتان، الماتى، سەمەي قالالارىنداعى جانە دوستىق ستانساسى ۆوكزالدارىنا ەرەكشە نازار اۋدارىلۋدا.
«اتالعان ۆوكزالداردىڭ ەسەپشى، كەزەكشى مەن وزگە دە قىزمەتكەرلەرى انتيسەپتيك، قورعانىش قولعابى، ماسكامەن قامتاماسىز ەتىلگەن. سونداي- اق جۇقپالى ىندەت بەلگىسى بار تۇلعا انىقتالعان جاعدايدا قاۋىپسىزدىك شاراسى مەن وزگە دە ارەكەت بويىنشا قىزمەتكەرلەرگە نۇسقاۋلىق وتكىزىلۋدە. ەلىمىزدەگى ۆوكزالداردا بارلىق عيماراتتاردى زارارسىزداندىرۋدى تۇراقتى جۇرگىزۋگە ارنايى جۋۋ قۇرالدارىنىڭ جەتكىلىكتى قورىمەن قامتاماسىز ەتىلگەن» ، دەلىنگەن حابارلامادا.
«جولاۋشىلار تاسىمالى» كومپانياسىنىڭ مالمەتىنشە، كوروناۆيرۋس ىندەتى تارالۋى كەزەڭىندە جوسپارىن وزگەرتىپ، جول ءجۇرۋ قۇجاتىن (بيلەتىن) وتكىزۋ تۋرالى شەشىم قابىلداعان جولاۋشىلار ونى بيلەت ساتىپ الىنعان ورىنداردا (ينتەرنەت سايتتارى مەن بيلەت كاسسالارىندا) جۇزەگە اسىرا الادى. سۇراۋ سانى ارتقان كەزدە بيلەتتى كەرى قايتارۋ پروتسەسى كۇتكەندەگىدەن كوپ ۋاقىت الۋى مۇمكىن.