بۇل تۋرالى «قازاقپارات» ح ا ا مەنشىكتى ءتىلشىسى حابارلادى.
بۇعان دەيىن COVID-19 يران مەن يتاليادان كەلگەندەردەن انىقتالعان بولسا، جاڭا جاعدايلار ەل ىشىندە انىقتالعان.
«جاڭادان تىركەلگەن ەكى ناۋقاس ينفەكتسيالىق اۋرۋحاناعا جاتقىزىلدى. ۆيرۋستى جۇقتىرعاندار - بۇعان دەيىن كوروناۆيرۋس انىقتالعان ەچميادزين قالاسىنىڭ تۇرعىنىمەن بايلانىستا بولعان تۇلعالار. ولار وزگە ناۋقاستارمەن بىرگە وقشاۋلاندىرىلدى»، - دەدى Facebook-تەگى پاراقشاسىندا ەلدىڭ دەنساۋلىق ساقتاۋ ءمينيسترى ارسەن توروسيان.
سونداي-اق 12-ناۋرىز كۇنى كەشكە ەلدە كوروناۆيرۋستىڭ تارالۋىنا بايلانىستى بيلىكتەگى «ازاماتتىق كەلىسىم» پارتياسى پرەمەر-مينيستر نيكول پاشينياننىڭ قاتىسۋىمەن وتىرىس وتكىزدى. ونىڭ ناتيجەسى بويىنشا ن. پاشينيان Facebook-تەگى پاراقشاسىندا ەڭبەك دەمالىسىن ۇزەتىنىن، ال ارمەنيا ۇكىمەتى جاعدايدى جان-جاقتى باعالاۋ ءۇشىن 13- ناۋرىز كۇنى كەڭەس وتكىزەتىنىن جازدى. كەڭەس قورىتىندىسى بويىنشا بۇدان ارعى شارالار جاريالاناتىن بولادى.
وسى رەتتە، پرەمەر-مينيستر اتاپ وتكەندەي، 13- ناۋرىز كۇنى بارلىق ءبىلىم بەرۋ مەكەمەلەرى جانە بالاباقشالار جۇمىس ىستەمەيدى. ول سونىمەن قاتار ەل ازاماتتارى سىرقاتتىڭ قانداي دا ءبىر بەلگىلەرى پايدا بولعان جاعدايدا دەرەۋ ماماندارعا جۇگىنۋ قاجەتتى تۋرالى كەڭەسكە قۇلاق اسا بەرمەيتىنىنە وكىنىش ءبىلدىردى. ارمەنيا ۇكىمەتىنىڭ باسشىسى حالىقتى سابىرلىققا جانە ەلدەگى جاعدايدى اسىرا ايتپاۋعا شاقىردى.
سوڭعى مالىمەتتەر بويىنشا، ەلدە جاڭا ىندەتتى جۇقتىرۋدىڭ 6 وقيعاسى تىركەلدى. العاشقى جاعداي 1- ناۋرىز كۇنى يراننان كەلگەن ارمەنيانىڭ 29 جاستاعى ازاماتىنان انىقتالدى. ونىمەن قارىم-قاتىناستا بولعان 31 ادام تساحكادزور قالاسىنداعى «Golden Palace» قوناقۇيىندە وقشاۋلاندىرىلدى. 11- ناۋرىزدا كوروناۆيرۋس ارمەنيانىڭ ەكى ازاماتىنان (45 جانە 27 جاستاعى) جانە يتاليانىڭ ءبىر ازاماتىنان (51 جاستا) تابىلدى. ۇشەۋى دە يتاليادان كەلگەن. 12- ناۋرىزدا تاعى ەكى ادامدا تەست وڭ ناتيجە كورسەتتى. وسى ۋاقىتتا وقشاۋلاندىرىلعان ادامداردىڭ جالپى سانى - 88.