بۇل تۋرالى ق ر اقپارات جانە قوعامدىق دامۋ ءمينيسترى داۋرەن ابايەۆ ايتتى، دەپ حابارلايدى قازاقپارات ءتىلشىسى.
«قولدانىستاعى زاڭناما كەمشىلىكتەرىنىڭ ءبىرى - بەيبىت جينالىستاردىڭ فورماسىن ناقتى رەگلامەنتتەۋدىڭ بولماۋى. وسىعان وراي زاڭ جوباسىندا ۇعىمدىق تۇسىنىكتەمە بەلگىلەۋ ۇسىنىلادى. بۇل بەيبىت جينالىس، جيىن، ەرەۋىل، جينالىس، شەرۋ سىندى نەگىزگى تۇسىنىكتەردى قالىپتاستىرۋعا جانە ولاردىڭ اراسىن جىكتەۋگە مۇمكىندىك بەرەدى»، - دەدى ماجىلىستە «قازاقستان رەسپۋبليكاسىندا بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بەيبىت جينالىستاردى ۇيىمداستىرۋ جانە وتكىزۋ ءتارتىبى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىنا تانىستىرعان داۋرەن ابايەۆ.
ونىڭ اتاپ وتۋىنشە، زاڭنامادا ەرەۋىل، جيىن، جينالىس تۇرىندەگى بەيبىت جينالىستاردى وتكىزۋ ءۇشىن ەسكەرتۋ ءتارتىبىن ەنگىزۋ جوسپارلانعان.
«بۇل رەتتە جەرگىلىكتى اتقارۋشى ورگاندار تاراپىنان بەيبىت جينالىس وتكىزۋگە جاۋاپ بولماعان جاعدايدا ول كەلىسىم بەرۋ دەپ سانالادى. دەگەنمەن شەرۋ، جيىن تۇرىندەگى بەيبىت جينالىستاردى وتكىزۋ ءۇشىن جەرگىلىكتى اتقارۋشى ورگانداردان كەلىسىم الۋ قاجەت. سونىمەن قاتار زاڭ جوباسىندا بەيبىت جينالىستار وتكىزۋ ءۇشىن بالاما ورىن ۇسىنۋ قۇقىعى قاراستىرىلاتىن بولادى»، - دەدى مينيستر.