ەۋروپادا باسقا ەلدەرگە قاراعاندا يتاليا ۆيرۋستان قاتتى زارداپ شەگىپ وتىر. ەلدە كوروناۆيرۋس جۇقتىرعاندار مەن قايتىس بولعاندار سانى وسۋدە، دەپ حابارلايدى قازاقپارات BBC- گە سىلتەمە جاساپ.
ەلدىڭ پرەمەر- ءمينيسترى دجۋزەپپە كونتەنىڭ مالىمدەۋىنشە، بارلار، مەيرامحانالار مەن شاشتارازدار دا جابىلادى. شەكتەۋ 25 - ناۋرىزعا دەيىن قويىلعان.
ەلدە مەكتەپتەر، سپورت زالدارى، مۋزەيلەر، تۇنگى كلۋبتار مەن باسقا دا مەكەمەلەر جابىق تۇر.
قازىرگى ۋاقىتتا يتاليادا 12 مىڭ كوروناۆيرۋس جۇقتىرۋ جاعدايى تىركەلدى، قايتىس بولعاندار سانى 827 ادامعا جەتتى.
ۆيرۋس «يۋۆەنتۋس» فۋتبول كلۋبىنىڭ ويىنشىسى دانيەلە رۋگانيدەن تابىلدى.
مالىمدەمەدە «يۋۆەنتۋس» كلۋبىنىڭ قازىرگى ۋاقىتتا كوماندا ىشىندە بارلىق قاجەتتى پروتسەدۋرالاردى جۇرگىزىپ جاتقانى، سونىڭ ىشىندە رۋحانيمەن بايلانىستا بولعانداردى وقشاۋلاپ جاتقانى ايتىلعان.
د د س ۇ توتەنشە جاعدايلار جونىندەگى باعدارلامالار جەتەكشىسى مايكل راياننىڭ ايتۋىنشا، يتاليادا كوروناۆيرۋس جۇقتىرعان 900 ادام جانساقتاۋ بولىمىندە جاتىر.
دۇنيەجۇزىلىك دەنساۋلىق ساقتاۋ ۇيىمى (د د س ۇ) جاڭا كوروناۆيرۋستىڭ تارالۋى پاندەميا دەڭگەيىنە جەتكەنىن ءمالىم ەتتى، سەبەبى ۆيرۋس كوپتەگەن ەلدەر مەن بارلىق قۇرلىقتى قامتىعان.
دوكتورر تەدروس گەبرەيەسۋس د د س ۇ- نىڭ جاڭا كوروناۆيرۋسقا قارسى كۇرەس كەزىندە بۇعان دەيىن بەرگەن كەڭەستەرىن وزگەرتپەيتىنىن ايتتى. ول ۇكىمەتتەردى «شۇعىل جانە اگرەسسيۆتى شارالار» قابىلداۋعا شاقىردى.
د د س ۇ باسشىسىنىڭ مالىمدەمەسىنەن كەيىن كەيبىر ەلدەر ۆيرۋستىڭ تارالۋىنىڭ الدىن الۋ ءۇشىن شەكتەۋلەردى قاتاڭداتتى.
514 ادام اۋرۋعا شالدىققان دانيادا جۇما كۇنى بارلىق مەكتەپتەر مەن ۋنيۆەرسيتەتتەر جابىلادى. ۇكىمەت 100 ادامنىڭ قاتىسۋىمەن وتەتىن بارلىق شارالاردى توقتاتۋعا شاقىردى.
ءۇندىستان 15- ساۋىرگە دەيىن ۆيزا بەرۋدى توقتاتتى. گۆاتەمالا بەيسەنبى كۇنى ەۋروپا ەلدەرىنىڭ ازاماتتارىنا ەلگە كىرۋگە تىيىم سالدى.
ا ق ش پرەزيدەنتى دونالد ترامپ كوروناۆيرۋستىڭ تارالۋىنىڭ الدىن الۋ ءۇشىن 30 كۇنگە ەۋروپا مەن ا ق ش اراسىنداعى كولىك قاتىناسىن توقتاتىنىن جاريالادى.