كورمەنىڭ اشىلۋ سالتاناتىندا سىبايلاس جەمقورلىققا قارسى ءىس- قيمىل اگەنتتىگىنىڭ وبلىس بويىنشا دەپارتامەنت باسشىسىنىڭ ءبىرىنشى ورىنباسارى راۆيل تولەبايەۆ ءسوز الىپ، قوعامداعى كەلەڭسىزدىكتەردى، جەمقورلىققا اپاراتىن قادامداردى سۋرەت تىلىمەن اشكەرەلەپ جۇرگەن ساعي احتانوۆتىڭ بۇگىنگى عاجايىپ كورمەسى ءۇشىن العىسىن ءبىلدىرىپ، ءىس- شاراعا ساتتىلىك تىلەدى.
جازۋشى، وبلىستىق «اقجول» گازەتىنىڭ باس رەداكتورى كوسەمالى ءساتتىباي ۇلى كوپشىلىكتىڭ ەرەكشە كورمەگە جينالىپ وتىرعانىن ايتىپ، وسىنداي كورمەلەر كوبىرەك وتسە دەگەن تىلەگىن ءبىلدىردى. سونداي-اق ول س. احتانوۆتىڭ شەبەرلىگىنە، جەمقورلىق سيپاتىن ناسيحاتتاۋداعى تاپقىر شەشەمىدەرىنە توقتالىپ، سۋرەتشىنىڭ «ءمور بار، باس جوق»، «الما پىسسە، اۋزىما تۇسسە»، «نەسيە» سۋرەت- پلاكاتتاردىڭ كورەرمەنگە قانداي وي سالاتىنىن تالداپ ايتىپ بەردى.
كورمە اۆتورى ساعي احتانوۆ جىلجىمالى كورمەسىن كورسەتۋ ءۇشىن تارازعا ارنايى كەلگەنىن ايتادى. ول وسىلايشا قوعامداعى ەڭ وزەكتى ماسەلە جەمقورلىق تاقىرىبىمەن كوپكە وي سالعىسى كەلگەن. سوندىقتان وسىنداي مۇمكىندىك بەرىپ وتىرعان ۇيىمداستىرۋشىلارعا ايتار العىسى دا شەكسىز.
جيىندا وبلىس اكىمدىگى مادەنيەت، ارحيۆتەر جانە قۇجاتتاما باسقارماسى باسشىسىنىڭ العىس حاتىن سۋرەتشىگە اتالعان باسقارما باسشىسىنىڭ ورىنباسارى لەسبەك امالوۆ تاپسىرىپ، قۇرمەت كورسەتتى. بۇدان سوڭ كوپشىلىك ۇلكەن زالعا قويىلعان پلاكات- كورمەنى تاماشالادى. بۇل جەرگە جۇزدەن استام تۋىندى قويىلعان. «باس ورنىنا جۇدىرىق»، «جەمقورلىق تىزبەگى»، «كرەديت - قارىز قارماعى»، «قازاننان قاقپاق كەتسە…»، «بيۋدجەت» ، «اقشاڭ بار ما؟» كارتينالارى بار.
ايتا كەتەيىك، كوشپەلى سۋرەت كورمەسى بىرنەشە كۇن تارازدىقتار نازارىنا ۇسىنىلادى. ودان كەيىن تۇركىستان وبلىسىنا جول تارتادى.
اۆتور: قاجى مۇرات