بۇل جايىندا ق ر ساۋدا جانە ينتەگراتسيا ءمينيسترى باقىت سۇلتانوۆ Facebook پاراقشاسىندا جازدى، دەپ حابارلايدى قازاقپارات ءتىلشىسى.
«جاقىن ارادا ءبىز وڭتۇستىك باعىتىندا اۋقىمدى ساۋدا جوباسى - وزبەكستانمەن شەكارادا «ورتالىق ازيا» حالىقارالىق ساۋدا- ەكونوميكالىق ىنتىماقتاستىق ورتالىعىنىڭ (ح س ە ى و) قۇرىلىسىن ىسكە اسىرۋعا كىرىسەمىز. بۇل تۋرالى بۇدان ەكى جىل بۇرىن مەملەكەت باسشىلارى دەڭگەيىندە ۋاعدالاستىققا كەلگەن بولاتىنبىز. ال ناقتى شارالاردى ءبىز ارىپتەسىمىز - وزبەكستان رەسپۋبليكاسىنىڭ ينۆەستيتسيالار جانە سىرتقى ساۋدا ءمينيسترى ساردور ۋمۋرزاكوۆپەن تالقىلادىق. ناۋرىزداعى ايەلدەر مەرەكەسىنە قاراماستان بىز ونىمەن كەلەشەك ح س ە ى و ورنى - «جىبەك جولى - گيشت كۋپريك» شەكارا بەكەتىندە كەزدەستىك» ، - دەپ اتاپ ءوتتى باقىت سۇلتانوۆ.
ونىڭ ايتۋىنشا، ح س ە ى و - ورتالىق ازيا ەلدەرىمەن ساۋدا ىنتىماقتاستىعىمىزدىڭ ماڭىزدى ەلەمەنتى. مۇندا تەك كوتەرمە- بولشەك ساۋدا نىساندارى مەن ولاردىڭ ينفراقۇرىلىمى عانا سالىنىپ قويماي، سونداي- اق ماڭىزدى كولىك- لوگيستيكالىق ورتالىق تا قۇرىلادى.
«الەمدەگى ەكونوميكالىق تۇراقسىزدىق، باعانىڭ تومەندەۋى، كوروناۆيرۋستىڭ حالىقارالىق ساۋداعا قاتەرى، تۋريزمنىڭ باسەندەۋى جاعدايىندا كورشىلەرمەن ساۋدانى قارقىنداتۋ- داعدارىس قۇبىلىستارىن بىرگە جەڭۋدىڭ ەڭ وڭتايلى ءتاسىلى. بۇگىندە ورتالىق ازيا - 71 ميلليون ادامنان استام حالقى بار سەرپىندى ءوڭىر. و ا- دا ىشكى ايماقتىق ەڭبەك ءبولىنىسى ءۇشىن ۇلكەن مۇمكىندىكتەر بار، ءوڭىر ەلدەرى ءبىر- بىرىنە ءتيىمدى وتكىزۋ نارىعى سانالادى. جانە ءبىزدىڭ ەلدەرىمىزدىڭ ءقازىردىڭ وزىندە ءوزارا بەلسەندى ىنتىماقتاستىق جاساۋىنىڭ دا ماڭىزى زور» ، - دەدى مينيستر.
ب. سۇلتانوۆ دەرەگىنشە، 2019 -جىلدىڭ قورىتىندىسى بويىنشا قازاقستاننىڭ ورتالىق ازيا ەلدەرىمەن تاۋار اينالىمى 5,1 ميلليارد ا ق ش دوللارىن قۇرادى. بۇل رەتتە وزبەكستان وڭىردەگى ءىرى ساۋدا ارىپتەسى سانالادى. قازاقستاننىڭ وڭىرمەن ءوزارا ساۋداسىنىڭ 60 پايىزدان استامى اتالعان ەلدىڭ ۇلەسىنە تيەسىلى. ءوزارا ساۋدانىڭ ءوسۋ قارقىنى 2017 -جىلدان باستاپ جالعاسۋدا جانە ورتا ەسەپپەن 30,7 پايىزدى قۇرايدى. ءوزارا ساۋدا وتكەن جىلى ءتورت ميللياردتىق شەكتەن اسىپ، بەس ميللياردقا جاقىنداپ قالدى.
«سوندىقتان ح س ە ى و قۇرۋ - ەلدەرىمىزدىڭ ەكونوميكالىق كووپەراتسياسىن ودان ءارى كۇشەيتۋگە اسەر ەتەدى جانە «وڭتۇستىك- سولتۇستىك، سولتۇستىك- وڭتۇستىك» ءدالىزىنىڭ ماڭىزدى جوبالارىنىڭ ءبىرى بولىپ تابىلادى. ول وڭىردەن باسقا ەلدەرگە باعىتتالعان ۇلكەن تاۋار قۇبىرىنىڭ ءبىر بولىگى بولماق. وزدەرىڭىز بىلەتىندەي، قازىرگى ۋاقىتتا قازاقستاندا كوتەرمە- تاراتۋ ورتالىقتارى مەن اگرو- لوگيستيكالىق ورتالىقتار جەلىسىن قامتيتىن تاۋار وتكىزۋ جۇيەسىن قۇرۋ جۇمىسى جۇرگىزىلۋدە. وسىعان ۇقساس ينفراقۇرىلىم كورشى وزبەكستان مەن قىرعىزستاندا دا قۇرىلۋدا. ح س ە ى و جوباسىن ىسكە اسىرۋ قازاقستان ءۇشىن وڭتۇستىككە قاقپا اشىپ قانا قويماي، وسى مەملەكەتتەردىڭ ءۇشىنشى ەلدەرگە، ءبىرىنشى كەزەكتە رەسەيگە، ەۋروپا مەن قىتايعا تاۋارلاردى بىرلەسىپ ەكسپورتتاۋلارى ءۇشىن ءبىرىڭعاي تەتىك قۇرۋعا مۇمكىندىك بەرەدى. ويتكەنى، حسەىو- عا وتە جاقىن ماڭدا 2 ءىرى اگلومەراتسيا - شىمكەنت پەن تاشكەنت ورنالاسقان. تىكەلەي جاقىن جەردە ءىرى جانە دامىعان ينفراقۇرىلىمدىق توراپتار - سارىاعاش تەمىر جول ستانسالارى، «جىبەك جولى» حالىقارالىق وتكىزۋ بەكەتى، باتىس ەۋروپا - باتىس قىتاي اۆتوجولى دا بار» ، - دەپ اتاپ وتەدى باقىت سۇلتانوۆ.