اپپەنين تۇبەگىندە تەك ماڭىزدى سەبەپتەرمەن جۇرۋگە عانا رۇقسات بەرىلگەن. بۇعان قوسا ەلدە جاپپاي ادامدار جينالاتىن ءىس- شارالارعا تىيىم سالىنىپ، بارلىق وقۋ ورىندارى، تاۋ- شاڭعى كۋرورتارى، كلۋتار مەن سۇلۋلىق سالوندارى جابىلعان.
قازىرگى تاڭدا يتاليادا 9 مىڭنان استام ادام جۇقپالى ىندەتكە تاپ بولعان. ال جالپى ەۋروپا مەملەتكەتتەرىندە بۇل كورسەتكىش 15 مىڭدى قۇراپ وتىر. 520 ادام كوز جۇمعان.
قازىرگى تاڭدا يتاليادا تۇرمەدە وتىرعان ازاماتتار شۋ شىعارا باستاپتى. ولار وزدەرىنە اۋرۋ جۇعادى دەپ قورقىپ، بيلىكتەن امنيستيا تالاپ ەتىپ وتىرعان كورىنەدى. سوتتالعانداردىڭ نارازىلىقتارىن ولاردىڭ تۋىستارى دا قولداپ وتىر: قىلمىسكەرلەردىڭ جاقىندارى جاپپاي تۇرمەنىڭ الدىنا شەرۋگە شىعۋدا.
بۇگىنگى كۇنى ينفەكتسيانىڭ تارالۋىنا بايلانىستى ءبىرقاتار ەلدەردە ساقتىق شارالارى كۇشەيتىلىپتى. يزرايل بۇل تۇستا باسقالارىنان اسىپ تۇسكەن: ەل بيلىگى سىرتتان كەلۋشىلەردىڭ بارلىعىن دەرلىك كارانتينگە جاۋىپ جاتىر ەكەن.
«ءبىراز اقىلداسىپ بارىپ، ءبىز يزرايلگە كەلگەندەردىڭ بارلىعىن ەكى اپتالىق كارانتينگە جابۋدى ءجون كورىپ وتىرمىز. بۇل وتە كۇردەلى شەشىم ەكەنى راس، دەسەك تە اتالمىش شارا ەلىمىزدىڭ ازاماتتارىنىڭ دەنساۋلىعىن قورعاۋ ءۇشىن جاسالىپ وتىر. ءبىز ءۇشىن بۇل الدىڭعى قاتارداعى ماسەلە»، - دەپ مالىمدەدى يزرايل پرەمەر- ءمينيسترى بينيامين نەتانياحۋ.
شەنەۋنىك كارانتينگە جابۋ تەك 14 كۇنگە جۇزەگە اسىرىلاتىندىعىن اتاپ ءوتتى. ال كارانتينگە جاتۋدان باس تارتقانداردى قىلمىستىق جاۋاپكەرشىلىك كۇتىپ تۇر ەكەن.