بۇل ءۇندىستاندا كوروناۆيرۋستىڭ بالادان انىقتالۋىنىڭ العاشقى وقيعاسى. كەرالا شتاتىندا تۇراتىن ۇل بالا اتا-اناسىمەن يتالياعا ساياحاتتاپ، وتكەن سەنبىدە ءۇندىستانعا ورالعان. ۇشاق قونعان سوڭ، وتباسى كوچي اۋەجايىندا تەكسەرىستەن وتكەن. اتا-اناسى مەن بالا جەرگىلىكتى اۋرۋحانادا كارانتينگە جاتقىزىلدى. سول كەزدە سابيدەن اۋرۋ بەلگىلەرى پايدا بولىپ، ىندەتكە شالدىققانى راستالدى.
بۇل وقيعادان بولەك، تاياۋدا يراندا بولىپ كەلگەن 63 جاستاعى ايەلدەن دە كوروناۆيرۋس انىقتالىپ وتىر. بۇل - دجاممۋ مەن كاشمير اۋماعىندا ىندەتكە شالدىعۋدىڭ ءبىرىنشى جاعدايى.
بۇگىندە ءۇندىستاندا COVID-19 ۆيرۋسىنا شالدىعۋدىڭ 43 وقيعاسى تىركەلدى. ەلدىڭ دەنساۋلىق ساقتاۋ مينيسترلىگى وكىلدەرىنىڭ مالىمەتىنشە، ينفەكتسيانى جۇقتىرۋدىڭ تاعى ءبىر جاعدايلارى تۋرالى دەلي مەن ۋتتار-پرادەشتەن حابارلانعان.
ايتا كەتسەك، بۇگىندە كاتار مەملەكەتى كوروناۆيرۋسقا بايلانىستى 14 ەلدەن، سونىڭ ىشىندە ءۇندىستاننان كەلەتىن ساياحاتتاۋشىلارعا ەلگە كىرۋگە ۋاقىتشا تىيىم سالدى.
كوروناۆيرۋستى 100 دەن استام ەلدە 100 مىڭنان استام ادام جۇقتىردى، 3 مىڭنان استام ادام كوز جۇمدى.