ۆيرۋس جۇقتىرۋدىڭ جاڭا دەرەكتەرى سەربيا، سلوۆاكيا، ۆاتيكان، پاراگۆاي، پەرۋ، كامەرۋن جانە توگودا تىركەلدى. ال نيۋ-يورك توتەنشە جاعداي جاريالادى، دەپ حابارلايدى قازاقپارات bbc گە سىلتەمە جاساپ.
نيۋ-يورك گۋبەرناتورى ەندريۋ كۋومو سوڭعى تاۋلىكتە كوروناۆيرۋس جۇقتىرعاندار سانىنىڭ 2 ەسەگە جۋىق ارتىپ كەتۋىنە بايلانىستى شتاتتا توتەنشە جاعداي رەجىمىن جاريا ەتتى. جالپى، بۇل شتاتتا ۆيرۋس جۇقتىرۋدىڭ 89 دەرەگى تىركەلگەن.
باسپا ءسوز ءماسليحاتىندا ءسوز سويلەگەن گۋبەرناتور سوڭعى كۇندەرى شتاتتىڭ مەديتسينالىق بيلىگى ۆيرۋستىڭ بار-جوعىن انىقتاۋ ءۇشىن «اگرەسسيۆتى» تەكسەرۋ جۇرگىزگەندىگىن اتاپ ءوتتى. بۇعان دەيىن الدىن الۋ شاراسى رەتىندە ونداعان ادام ءماجبۇرلى تۇردە كارانتينگە جاتقىزىلعان بولاتىن.
«جاپپاي كاراتينگە جاتقىزۋ ينفەكتسيانىڭ تارالۋىن باياۋلاتۋدىڭ ۇزدىك ءتاسىلى ەكەندىگىنە ەشقانداي كۇمان جوق»، - دەپ اتاپ وتەدى ەندريۋ كۋومو.
ايتا كەتەيىك، قازىرگى ۋاقىتتا بۇكىل الەمدە كوروناۆيرۋس جۇقتىرعان ادامداردىڭ سانى 105 مىڭنان اسىپ كەتتى. ونىڭ 24 مىڭى قىتايدان تىسقارى اۋماقتا تىركەلىپ وتىر. وسى ۋاقىتقا دەيىن الەمدە كوروناۆيرۋستان 3400 دەن استام ادام كوز جۇمسا، ونىڭ شامامەن 3100 ى قىتايدا تىركەلگەن.