تاريحقا كوز جۇگىرتسەك، 1910 - جىلى كوپەنگاگەندەگى سوتسياليست ايەلدەردىڭ حالىقارالىق كونفەرەنسياسىندا گەرمان جانە حالىقارالىق جۇمىسشى قوزعالىسىنىڭ قايراتكەرى ك. سەتكينانىڭ ۇسىنىسى بويىنشا ناۋرىزدىڭ 8- ءىن حالىقارالىق ايەلدەر كۇنى رەتىندە اتاپ ءوتۋ تۋرالى شەشىم قابىلداندى. 1914 -جىلدان كەيىن كوپ ەلدەردە ناق وسى كۇن ايەلدەر مەرەكەسى رەتىندە اتالاتىن بولدى.
بۇل كۇن - ايەلدەر قۇقىن قورعاۋ جانە حالىقارالىق بەيبىتشىلىك كۇنى. بىرىككەن ۇلتتار ۇيىمى 1975 -جىلدى حالىقارالىق ايەلدەر جىلى دەپ جاريالاپ، سول جىلعى ناۋرىزدىڭ 8-ىنەن باستاپ ايەلدەر قۇقىن قورعاۋ جانە حالىقارالىق بەيبىتشىلىك كۇنىن وتكىزە باستادى. قازاقستان رەسپۋبليكاسىندا دا بۇل مەرەكەگە اسا ءمان بەرىلىپ، وسى كۇنى ەلوردا مەن بارلىق وبلىستاردا مەرەكەلىك شارالار ۇيىمداستىرىلادى.
ايتا كەتەرلىگى، كەشە مەرەيلى مەرەكەگە وراي، قازاقستان پرەزيدەنتى قاسىم- جومارت توقايەۆ ايەلدەر قاۋىمىن مەرەكەسىمەن قۇتتىقتادى.
«ارداقتى انالار! اياۋلى ارۋلار! سىزدەردى حالىقارالىق ايەلدەر كۇنىمەن شىن جۇرەكتەن قۇتتىقتايمىن! ايەلدەر قاۋىمى - ءاردايىم وتباسىنىڭ ۇيىتقىسى، بەرەكە- بىرلىكتىڭ شىراقشىسى. ءار ادامنىڭ ومىرىندەگى قۋانىشتى ءارى جارقىن ساتتەردىڭ كوپ بولۋىنا سىزدەر مول ۇلەس قوسىپ كەلەسىزدەر. ەل باسىنا كۇن تۋعاندا اسىل انالارىمىز بەن اياۋلى ارۋلارىمىز قيىندىققا مويىماي، ۇلت تاعدىرىنا ارالاستى. ەسەلى ەڭبەگىمەن جانە ەرەن ەرلىگىمەن تانىلعان ايەلدەردىڭ ەسىمدەرى تاريح جىلناماسىنا ماڭگىلىككە جازىلىپ، جادىمىزدا جاتتالادى»، - دەلىنگەن قۇتتىقتاۋدا.
پرەزيدەنت اتاپ وتكەندەي، ەگەمەن ەلىمىزدە ايەلدەر قاۋىمى ءۇشىن جاڭا مۇمكىندىكتەرگە جول اشىلدى. وتباسى ينستيتۋتىن، كوپ بالالى انالاردى، كاسىپكەر ايەلدەردى قولداۋ جانە گەندەرلىك تەڭدىكتى قامتاماسىز ەتۋ - مەملەكەتتىك ساياساتتىڭ اسا ماڭىزدى باسىمدىعى.
اۆتور: رۋسلان عابباسوۆ