سونداي- اق، اۋدانداعى توتەنشە جاعدايلار سالدارىن جويۋ جونىندەگى شتابتىڭ وتىرىسىن وتكىزدى، دەپ حابارلايدى قازاقپارات ءوڭىر اكىمىنىڭ باسپا ءسوز قىزمەتىنە سىلتەمە جاساپ.
ايماق باسشىسىمەن بىرگە اۋدانعا وبلىستىق قۇقىق قورعاۋ ورگاندارىنىڭ باسشىلارى دا ىلەسىپ باردى.
وبلىس اكىمى قاراكەمەر اۋىلىنىڭ اقساقالدارى قاتىسقان جيىندا اۋدانداعى احۋال تۇراقتالعانىن، كۇندەلىكتى تىرشىلىك قالىپتى دەڭگەيدە جالعاسىپ وتىرعاندىعىن اتاپ ءوتتى. كوكتەمگى دالا جۇمىستارىنا دايىندىق بارىسىن بارلاپ، اۋا رايىنىڭ قولايلىلىعىن پايدالانىپ اباتتاندىرۋ شارالارىن باستاۋ كەرەكتىگىن تىلگە تيەك ەتتى.
اۋىل جاستارىنىڭ بوس ۋاقىتىن ءتيىمدى ۇيىمداستىرۋ - اعا بۋىن وكىلدەرىنىڭ باستى مىندەتى. وبلىس اكىمى كورشىلەس اۋىل جاستارىنىڭ بىرلەسە قاتىسۋىمەن ءتۇرلى مادەني- سپورتتىق ءىس- شارالاردى ۇيىمداستىرۋدىڭ ماڭىزدىلىعىنا توقتالدى. وسى ورايدا بەردىبەك ساپاربايەۆ ۇلگى رەتىندە كۇرد دياسپوراسى قالىڭ شوعىرلانعان تالاس اۋدانىنىڭ قاسقابۇلاق اۋىلىن مىسالعا كەلتىردى. ول اۋىلدا سوڭعى بەس جىلدا بىردە- ءبىر قۇقىق بۇزۋشىلىق تىركەلمەگەنىن، اتاۋلى الەۋمەتتىك كومەك (ا ءا ك) الۋشىلاردىڭ مۇلدە جوقتىعىن، تۇرعىنداردىڭ ماتەريالدىق جاعدايلارى دا ويداعىداي ەكەندىگىن تىلگە تيەك ەتتى. سونىمەن قاتار، اۋىلداعى بارلىق ماڭىزدى شەشىمدەردى اقساقالدار كەڭەسى قابىلدايتىنىن اتاپ ءوتتى.
ارداگەر تولە سۇگىربايەۆ جەرگىلىكتى اۋرۋحانانى كادرلارمەن جانە مەديتسينالىق جابدىقتارمەن قامتاماسىز ەتۋگە، گاز تارتۋعا قول ۇشىن بەرۋدى سۇرادى.
«الەۋمەتتىك تۇيتكىلدەر، ونىڭ ىشىندە كوگىلدىر وتىنمەن قامتاماسىز ەتۋ ماسەلەسى ءوز شەشىمىن تابادى. ەل پرەزيدەنتى قورداي اۋىلدارىنداعى پروبلەمالار تۋرالى حاباردار. بۇل تۇرعىدا ءتيىستى مينيسترلىكتەرمەن تىعىز جۇمىس ىستەۋ كەرەك»، - دەپ اتاپ ءوتتى ايماق باسشىسى.
ماسانشى جانە سورتوبە اۋىلدارىنىڭ اقساقالدارىمەن اڭگىمەلەسكەن بەردىبەك ساپاربايەۆ جەرگىلىكتى تۇرعىنداردى قالىپتى جاعدايدا ءومىر سۇرۋگە شاقىرىپ، زاڭ اياسىندا قوعامدىق ءتارتىپ بارىنشا ساقتالاتىندىعىنا توقتالدى. كوكەيدەگى سۇراقتارى مەن شاعىمدارىن ارنايى كەلگەن وبلىستىق پروكۋراتۋرا، ۇ ق ك جانە پوليتسيا دەپارتامەنتتەرى باسشىلارى الدىندا ايتۋعا بولاتىندىعىن جەتكىزدى.
جەرگىلىكتى شارۋالار شۋ اۋدانىندا كوكونىس داقىلدارىن ەگۋدى، قولدا بار ازىق- تۇلىك قورىن وبلىس اۋماعىنداعى بازارلاردا ساتۋدى تيىسىنشە جالعاستىرا بەرۋىن باسا ايتتى.
ماسانشى اۋىلىنىڭ تۇرعىنى يسحار لوۋ بۇگىنگى جاعدايدىڭ تۇراقتى ەكەنىن، ادامدار ءوز ۇيلەرىنە ورالىپ، بالالار ساباققا بارىپ جۇرگەندىگىنە نازار اۋدارتتى. ول بالالاردىڭ ءوزارا قارىم- قاتىناسىن نىعايتۋ ءۇشىن قازاق جانە ورىس تىلدەرىندە وقىتاتىن ارالاس مەكتەپتەردى اشۋ تۋرالى ۇسىنىس ءبىلدىردى. ايەلدەر كەڭەسى مەن اقساقالدار سوتىنىڭ قۇرىلعاندىعىن حابارلاپ، ول قوعامدىق ءتارتىپ پەن قاۋىپسىزدىكتى قامتاماسىز ەتۋ جونىندەگى جۇمىستى ۇتىمدى ۇيلەستىرگەنى ءۇشىن اكىمدىك پەن قۇقىق قورعاۋ ورگاندارىنا العىسىن ايتتى. سونداي- اق، يسحار لوۋ جاستاردى ارانداتقان جانە الەۋمەتتىك جەلىلەردە الاۋىزدىققا ۇندەگەن ادامداردى انىقتاپ، شارا قولدانۋدى سۇرادى.
وبلىس اكىمىنىڭ تۇرعىندارمەن كەزدەسۋلەرىندە بارلىق جۇمىستار مەن شارالار زاڭ اياسىندا ىسكە اسۋ كەرەكتىگى باسا ايتىلدى.
«ءبىز بارلىعىمىز زاڭ الدىندا بىردەيمىز. ونى كەز كەلگەن ادام ۇلتى مەن ءدىني نانىمىنا قاراماستان بىردەي ساقتاۋعا ءتيىس. زاڭدى بۇزعاندار قاتاڭ تۇردە جاۋاپ بەرەتىن بولادى. كەز كەلگەن جاعدايدا ۇلتتىق قۇندىلىقتار مەن تاربيە نەگىزدەرىنە جۇگىنۋ قاجەت. سول كەزدە عانا قوعامدىق ءتارتىپ، ىنتىماق ورنايدى»، - دەدى بەردىبەك ساپاربايەۆ.
اۋدانداعى جۇمىس ساپارىنىڭ سوڭىندا وبلىس اكىمى سورتوبە اۋىلىندا توتەنشە جاعدايدى جويۋ جونىندەگى شتاب وتىرىسىن وتكىزدى. وندا اۋىل اكىمدەرىنە جەرگىلىكتى تۇرعىندارمەن جانە قوعام بەلسەندىلەرىمەن ۇنەمى بايلانىستا بولۋدى، تۋىنداعان ماسەلەلەرگە جەدەل دەن قويۋدى، جۇمىسپەن قامتۋ جانە جاستاردىڭ بوس ۋاقىتىن ۇيىمداستىرۋعا ايرىقشا نازاردا اۋدارۋدى ەسكەرتىپ، ناقتى تاپسىرمالار جۇكتەدى.
اۆتور: قاجى مۇرات