بۇل تۋرالى ق ر اقپارات جانە قوعامدىق دامۋ ءمينيسترى داۋرەن ابايەۆ «حابار» ارناسىنىڭ «اشىق ديالوگ» باعدارلاماسىندا ايتتى، دەپ حابارلايدى قازاقپارات ءتىلشىسى.
«قوردايدا بولعان جاعدايدان كەيىن ءبىر اي ءوتتى. ودان بەرى ەموتسيالار باسىلدى. كەز كەلگەن ماسەلەنى سالماقتى تالقىلاعان ءجون. مەملەكەت باسشىسى قاسىم-جومارت توقايەۆ جامبىل وبلىسى، قورداي اۋدانىنا جۇمىس ساپارىمەن العىس ايتۋ كۇنى باردى. ول بۇل جاعدايعا كىنالىلەر قاي ۇلت وكىلى ەكەندىگىنە قاراماستان جازاسىن الاتىنىن ايتتى. سونداي-اق، مەملەكەت باسشىسى ارانداتۋشىلىققا بوي الدىرماي، ەتنوسارالىق كەلىسىمدى، بەيبىتشىلىك پەن تاتۋلىقتى ساقتاپ قالۋ كەرەكتىگىن ايتتى»، - دەدى ق ر اقپارات جانە قوعامدىق دامۋ ءمينيسترى داۋرەن ابايەۆ.
سونداي-اق مينيستر قاسىم-جومارت كەمەل ۇلى قۇقىق قورعاۋ ورگاندارىنا سول اۋداندا كونتراباندالىق بيزنەسكە قاتىسى بار ادامداردىڭ بارلىعىن انىقتاپ، جازالاۋدى تاپسىرعاندىعىن جەتكىزدى.
«قايعىلى جاعدايعا وسى كونتراباندا سەبەپ بولعان. سول كۇنى ءبىرقاتار قالادا بولعان ميتينگتەرگە قاتىستى پىكىر بىلدىرە المايمىن، سەبەبى ايتاتىن جاڭا ەشتەڭە جوق. ق ر ىشكى ىستەر مينيسترىلىگى وعان قاتىستىنىڭ ءبارىن ءتۇسىندىرىپ قويعان. بۇل - رۇقساتسىز بولعان ميتينگتەر. مۇنداي شارا وتكىزۋ ءۇشىن بيلىكتىڭ رۇقساتى كەرەك. مۇنداي ارەكەتتەر ارنايى رۇقساتسىز ۇيىمداستىرىلسا زاڭعا قايشى بولادى. قازىرگى ۋاقىتتا بەيبىت جينالىستار تۋرالى زاڭ تالقىلانۋدا ەكەنىن ايتا كەتۋ كەرەك. مەن جاڭا عانا قاراعاندىدان كەلدىم. ول جاقتا بۇل زاڭ جوباسى وتە جاقسى تالقىلاندى. زاڭ جوباسىنا ەنگىزۋگە بولاتىن قىزىقتى يدەيالار دا ايتىلدى»، - دەيدى ول.