قازاقستاندا مۋزەيلەردى دامىتاتىن جاڭا ورتالىق قۇرىلدى

ق ر ۇلتتىق مۋزەيى ديرەكتورىنىڭ ورىنباسارى ايبار قاسەناليننىڭ ايتۋىنشا، قازاقستاندىق مۋزەيلەر ادىستەمەلىك جەتىلدىرۋ جۇمىستارىنا ءماجبۇر.

«جىل باسىنان بەرى مادەنيەت جانە سپورت مينيسترلىگى كەلەلى ىستەردى قولعا الىپ وتىر. سونىڭ ءبىرى - مادەنيەت سالاسىنىڭ ءار باعىتتارىنا بايلانىستى ۇيلەستىرۋ-ادىستەمەلىك ورتالىقتارىن قۇرۋ. قازىرگى ۋاقىتتا قازاقستان مۋزەيلەرىندە ءارى ادىستەمەلىك، ءارى ۇيلەستىرۋ فۋنكتسياسى بەرىلگەن ەش ورتالىق جوق. مادەنيەت جانە سپورت مينيسترلىگى ءوز قۇزىرەتى شەڭبەرىندە عانا قىزمەت اتقارادى. ال بارلىق مۋزەيلەرگە جالپى ادىستەمەلىك تۇرعىدان، جالپى دامىتۋ بويىنشا نۇسقاۋلىق ۇسىنىپ وتىراتىن ۇيىم كەرەك. سوندىقتان، مينيسترلىك جانىنان «قازاقستان مۋزەيلەرىن دامىتۋ جونىندەگى ۇيلەستىرۋ- ادىستەمەلىك ورتالىعى» قۇرىلدى»، - دەدى ا. قاسەنالين ق ر ۇلتتىق مۋزەيىندە وتكەن ورتالىق تانىستىرىلىمىندا.

سونىمەن بىرگە، سپيكەر ۇيلەستىرۋ ورتالىعىنىڭ قانداي جۇمىستارمەن اينالىساتىنىن ءتۇسىندىردى.

«ورتالىقتىڭ نەگىزگى مىندەتتەرى - ولكەتانۋ جانە ەكسكۋرسيالىق جۇمىستاردى دامىتۋ مەن ادىستەمەلىك قۇرالدارمەن قامتاماسىز ەتۋ. جوعارىدا ايتىپ وتتىك، قازاقستاندا ەش ورتالىق ادىستەمەلىك نۇسقاۋلىق دايىندامايدى، ءار مۋزەي دەربەس جۇمىس ىستەپ كەلەدى. بارلىعىن ورتالىقتاندىرىپ، باسىمدىقتار مەن ءالسىز تۇستارىن انىقتاپ، ناقتى ۇسىنىمدار بەرسەك، قازاقستان مۋزەيلەرىنىڭ جۇمىسى جۇيەلەنەر ەدى»، - دەدى ول.

ونىڭ ايتۋىنشا، تاريحي نىساندارعا كەلۋشىلەردى تارتۋ جۇمىسى دا ءالى قولعا الىنباعان. قاي نىسانعا نەشە تۋريستىڭ كەلىپ جاتقانى بەلگىسىز.

«2001-جىلى رەسپۋبليكا بويىنشا مۋزەيگە كەلۋشىلەر - 3 ميلليون ادامنان اسسا، 2008-جىلى - 4 ميلليون ادام، 2018-جىلى - 6 ميلليون ادامنان اسقان. جاڭا ورتالىقتىڭ تاعى ءبىر فۋنكتسياسى - مۋزەي كەلۋشىلەرىنىڭ سانى مەن قۇرامىن انىقتاۋ بولماق. جەرگىلىكتى حالىق ەسەبىنەن بە، شەتەلدىك تۋريست پە، وتاندىق تۋريست پە بارلىعىن ساراپتايدى. بۇل جەردە ساراپتامالىق جۇمىس تەك قانا رەسپۋبليكالىق، ۇلتتىق مۋزەيلەرگە ەمەس، وبلىستىق، اۋداندىق دەڭگەيدەگى مۋزەيلەردى دە قامتيدى»، - دەدى ا. قاسەنالين.