و ك ق- دا وتكەن باسپا ءسوز ءماسليحاتىندا بۇل سۇراق دەنساۋلىق ساقتاۋ ءمينيسترى ەلجان ءبىرتانوۆقا قويىلدى، دەپ حابارلايدى قازاقپارات ءتىلشىسى.
«مەديتسينالىق ماسكا بويىنشا وتاندىق وندىرۋشىلەر تاۋلىك بويى جۇمىس جۇرگىزىپ جاتىر. ماسكالار ەكى باعىت بويىنشا وندىرىلۋدە: بىرىنشىدەن مەديتسينالىق جانە سانيتارلىق، پوليتسيا جانە شەكارالىق قىزمەتكەرلەرگە «س ك- فارماتسيا» ارقىلى ساتىپ الامىز. ەكىنشىدەن جەكە ءدارىحانالارعا ماسكالار ديستريبيۋتور ارقىلى جەتكىزىلەدى. سونىمەن قازىر كارانتينگە جاتقان ازاماتتاردىڭ سانى كوبەيگەندىكتەن، ءبىزدىڭ مەديتسينا سالاسىنداعى ماسكالار مەن باسقا دا قۇرىلعىلارعا دەگەن قاجەتتىلىك كوتەرىلىپ كەلەدى. ءبىز زاۋىتتاردان ماسكالاردى الامىز. قالعاندارى ءدارىحانالارعا جونەلتىلۋدە»، - دەدى ەلجان ءبىرتانوۆ و ك ق- دا وتكەن باسپا ءسوز ءماسليحاتىندا.
ءمينيستردىڭ ايتۋىنشا مەديتسينالىق ماسكا بويىنشا جۇمىستى ۇيلەستىرەتىن ارنايى شتاب تا قۇرىلعان.
«قاي قالادا تاپشىلىق جوعارى، سول جاققا جىبەرىپ جاتىرمىز. قازىر بۇكىل زاۋىتتار تاۋلىك بويى جۇمىس ىستەۋدە. تاپشىلىق بولسا دا ول ۇزاققا بارمايدى دەپ سەنەمىز. كوپ جاعداي حالىقتىڭ تۇسىنىگىنە بايلانىستى. ءدارىحانالارعا سالساق، قازىر ءبارىن ساتىپ الادى. ودان كەيىن اۋرۋحانالاردا ناۋقاستاردى قالاي ەمدەيمىز؟ مەديتسينالىق قىزمەتكەرلەردە سونداي قورعاۋ قۇرالدارى بولماسا ينفەكسيا تەز تارايدى. سوندىقتان ەڭ بىرىنشىدەن مەديتسينالىق قىزمەتكەرلەرگە، پاتسيەنتتەر جاتقان اۋرۋحانالارعا ماسكالار كەرەك»، - دەدى ول.
ەلجان ءبىرتانوۆ ءوز سوزىندە ينفەكسيا بولماسا ماسكانى تاعۋدىڭ قاجەتى جوقتىعىن تاعى دا ەسكە سالدى.
«ولاردىڭ دا (الىپساتارلاردىڭ - اۆت. ) ماسەلەسى بەلگىلى. كەشە دە، بۇگىن دە قۇقىق قورعاۋ ورگاندارىنا ارنايى تاپسىرما بەرىلدى. مىسالى كەدەن ورگاندارىنا دا ءتيىستى جۇكتەمەلەر بەرىلىپ وتىر. شەكارا قىزمەتكەرلەرى كوپ كومەكتەسۋدە. كونتراباندا بولسا توقتاتىپ، ۇستاپ، ءتيىستى اقپاراتتاردى بىزگە جولدايدى. جالپى ءبىزدىڭ نەگىزگى ماقساتىمىز - ەكسپورتقا جىبەرمەي، بۇكىل ماسكانى ءدارىحانالارعا تاراتۋ»، - دەدى ول.
اۆتور: ايان بەكەن ۇلى