قازىرگى ۋاقىتتا مينيسترلىك ەكسپورتتىق باقىلاۋدىڭ قازىرگى زامانعا ساي جانە ءتيىمدى جۇيەسىن قۇرۋ ماقساتىندا «ەرەكشە تاۋارلاردى باقىلاۋ تۋرالى» (ق ر «ەكسپورتتىق باقىلاۋ تۋرالى» زاڭى جاڭا رەداكتسيادا) جانە «ەرەكشە تاۋارلاردى باقىلاۋ ماسەلەلەرى بويىنشا قازاقستان رەسپۋبليكاسىنىڭ كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» (ىلەسپە زاڭ جوباسى) زاڭ جوبالارىن ازىرلەپ جاتىر.
بۇل زاڭ جوبالارى جاپپاي قىرىپ-جويۋ قارۋىن تاراتپاۋعا قاتىستى قازاقستان رەسپۋبليكاسىنىڭ حالىقارالىق مىندەتتەمەلەرىن ساقتاۋعا باعىتتالعان (ب ۇ ۇ قاۋىپسىزدىك كەڭەسىنىڭ 1540 قارارى) قارۋ-جاراق پەن اسكەري تەحنيكانى زاڭسىز ساتۋعا جول بەرمەۋدى كوزدەيدى (قارۋ-جاراق ساۋداسى تۋرالى شارت).
«قازىرگى كەزدە زاڭ جوبالارىنىڭ تۇجىرىمدامالارى قازاقستان رەسپۋبليكاسى ۇكىمەتى جانىنداعى زاڭ جوبالاۋ قىزمەتى ماسەلەلەرى جونىندەگى ۆەدومستۆوارالىق كوميسسيانىڭ 499-وتىرىسىندا ماقۇلداندى»، دەلىنگەن حابارلامادا.
ايتا كەتۋ كەرەك، قولدانىستاعى «ەكسپورتتىق باقىلاۋ تۋرالى» زاڭ 2007-جىلى قابىلدانعان. 10 جىلدان استام بۇرىن قۇرىلعان قوسارلى جانە اسكەري ماقساتتاعى تاۋارلاردى باقىلاۋ جۇيەسىنىڭ قالىپتاسقان ۇيىمدىق قۇرىلىمى مەن حالىقارالىق ستاندارتتارعا جاۋاپ بەرەتىن تولىققاندى زاڭناماسى بار.
«تەز وزگەرىپ جاتاتىن حالىقارالىق احۋال جاعدايىندا قوسارلى جانە اسكەري ماقساتتاعى تاۋارلاردى باقىلاۋدىڭ ۇلتتىق جۇيەسى نورماتيۆتىك-قۇقىقتىق بازانى تۇراقتى دامىتۋدى جانە جەتىلدىرۋدى تالاپ ەتەدى.
قازىرگى ۋاقىتتا زاڭ جوبالارى قازاقستان رەسپۋبليكاسىنىڭ مۇددەلى مەملەكەتتىك ورگاندارىنا كەلىسىم جۇمىستارىن جۇرگىزۋ ءۇشىن جولداندى»، دەلىنگەن حابارلامادا.