پەتروپاۆل تۇرعىندارى الەۋمەتتىك جەلىلەردە مەديتسينالىق ماسكالاردىڭ كوپتەگەن ءدارىحانالاردان جوعالعانىن ايتىپ، شاعىمدانۋدا. ونى تابۋ ءۇشىن بۇگىندە قالانى شارلاۋ قاجەت. الايدا مۇنداي ماسكانى تانىمال حابارلاندىرۋ سايتتارىنان ەش قيىندىقسىز تابۋعا بولادى. باعاسى - 80-100 تەڭگە شاماسىندا.
«دەنساۋلىق ساقتاۋ باسقارماسى بولشەك ساۋداعا اسەر ەتە المايدى. ولار جەكە كاسىپكەرلەر. زاۋىتتارمەن نەمەسە ءونىمدى جەتكىزۋشىلەرمەن تىكەلەي جۇمىس ىستەيدى. قازىرگى ۋاقىتتا ماسكا تاپشى ەكەنى راس. كۇندەلىكتى اكەلىنگەنىمەن ونى بىردەن تالاپ الادى. دەلدالدار كەرى اسەرىن تيگىزىپ جاتىر. قولدان كەلگەنشە ارەكەت ەتىپ جاتىرمىز. ماسكا جاسايتىن زاۋىتتارعا تاپسىرىس بەردىك. وڭىرگە قاجەتىنشە جەتكىزىلەدى» ، - دەدى س ق و دەنساۋلىق ساقتاۋ باسقارماسىنىڭ جەتەكشىسى تيمۋر سۇلتانعازيەۆ.
تيمۋر سۇلتانعازيەۆتىڭ پىكىرىنشە، حالىقتىڭ كوپشىلىگى بۇل ماسكالاردى نە ءۇشىن جانە قاي ۋاقىتتا كيۋ قاجەتتىگىن بىلمەيدى.
«دۇنيەجۇزىلىك دەنساۋلىق ساقتاۋ ۇيىمىنىڭ مەديتسينالىق ماسكانى پايدالانۋ بويىنشا ۇسىنىسى بار. بىرىنشىدەن، ماسكانى كيۋ ارقىلى تۇماۋدىڭ الدىن الۋعا جانە كوروناۆيرۋسپەن كۇرەسۋگە بولاتىندىعى دالەلدەنبەگەن. ەكىنشىدەن، اۋىرماساڭىز ماسكا كيۋ مىندەتتى ەمەس. الايدا سىزدە جۇقپالى رەسپيراتورلىق اۋرۋلاردىڭ بەلگىلەرى بولسا، تۇشكىرسەڭىز، جوتەلسەڭىز، اينالاداعىلاردى اۋىرتپاۋ ءۇشىن ماسكا كيگەنىڭىز دۇرىس. باسقا جاعدايدا ماسكا كيۋگە كەڭەس بەرمەيمىن. اۋرۋدان ساقتانعىڭىز كەلسە تەرەزەنى ءجيى اشىپ، جەلدەتىپ وتىرىڭىز، ىلعالدى تازالىقتى ءجيى جۇرگىزىڭىز. قولدى سابىنمەن جۋىپ، قۇرامىندا ءسپيرتى بار سۇيىقتىقتارمەن ءسۇرتىڭىز. ال اۋرۋدىڭ العاشقى بەلگىلەرى بايقالعان جاعدايدا بىردەن جەدەل جاردەم قىزمەتىن شاقىرىڭىز» ، - دەيدى تيمۋر سۇلتانعازيەۆ.
دەنساۋلىق ساقتاۋ باسقارماسىنىڭ مالىمەتىنشە، وڭىردەگى ەمدەۋ مەكەمەلەرىندە ءدارى- دارمەك جەتكىلىكتى. پرەپاراتتاردى الۋعا وبلىسقا قوسىمشا 7,5 ميلليون تەڭگە بولىنسە، ەمدەۋگە قاجەتتى كەرەك- جاراق، سونىڭ ىشىندە مەديتسينالىق ماسكالار دا تولىعىمەن الىندى.