يوردانيادا جاڭا ۆيرۋسقا قارسى قولعا الىنعان شارالار تۋرالى، «قازاقپارات» ح ا ا- ءنىڭ تاياۋ شىعىستاعى ءتىلشىسى حابارلايدى.
يوردانيانىڭ دەنساۋلىق ساقتاۋ ءمينيسترى سااد دجابەر باسپا ءسوز ءماسليحاتى بارىسىندا بۇگىن كورولدىكتە جۋىردا يتالياعا بارىپ كەلگەن ازاماتتىڭ كوروناۆيرۋس جۇقتىرۋ جاعدايى تىركەلگەندىگىن حابارلادى. ونىڭ ۆيرۋس جۇقتىرعانى ايقىن. وسىعان قاراي تاعى ءبىر ادام قاۋىپسىزدىك ماقساتىندا كارانتينگە جاتقىزىلدى.
«كوروناۆيرۋس جۇقتىرعان پاتسيەنتتىڭ وتباسىنىڭ مۇشەلەرى ىندەتتەن امان. الايدا ۆيرۋس جۇقتىرعان اداممەن بايلانىستا بولعانداردىڭ بارلىعى 14 كۇنگە كارانتينگە جاتقىزىلادى. يوردانيا قازىر قالىپتاسقان جاعدايعا تولىق دايىن. ال ۆيرۋس جۇقتىرعان ادام كارانتينگە جاتقىزىلىپ، تولىقتاي وقشاۋلاندىرىلدى. ونىمەن ەشكىم بايلانىسا المايدى، پاتسيەنتتىڭ جاعدايى قالىپتى»، - دەدى س. دجابەر.