دەگەنمەن، وسى جاعدايعا بايلانىستى قالا اكىمى سوگىس الدى، دەپ حابارلايدى pavlodarnews.kz.
ايتا كەتەيىك، 1-ناۋرىز كۇنى پاۆلودارلىق تاسىمالداۋشى ءوزىنىڭ حابارلاندىرۋىمەن جۇرتتى تاڭ قالدىردى. وندا بىلاي دەپ جازىلعان ەدى:
«جەڭىلدىگى بار قالالىقتار، اكىمدىكتە سىزدەردىڭ جول اقىڭىزدى تولەيتىن اقشا جوق، سوندىقتان ونى وزدەرىڭىز تولەيسىزدەر».
حابارلاندىرۋدىڭ فوتوسى الەۋمەتتىك جەلىلەر ارقىلى تارادى. زەينەتكەرلەر تاڭەرتەڭگى ۋاقىتتان بەرى جول اقىسىنا ادەتتەگى 40 ەمەس، 80 تەڭگە تولەگەنىن ايتىپ شاعىمداندى. حابارلاندىرۋ جارتى كۇن بويى قالاداعى 6 باعىت بويىنشا قاتىنايتىن اۆتوبۋستاردا ءىلىنىپ تۇردى. ولار - №1، 1ە، 2، 9، 18، 27 اۆتوبۋستار.
ودان كەيىن تاسىمالداۋشى اكىمدىكپەن كەلىسىمگە كەلگەننەن كەيىن بولار، حابارلاندىرۋدى الىپ تاستاپ، جەڭىلدىكتەر قالپىنا كەلدى.
ءىزىن الا جەلىلەردە «پاۆلودار اۆتوكومبيناتى» ج ش س ديرەكتورى الەكساندر پانچەنكونىڭ بەينەحابارلاندىرۋى تارادى.
«بۇگىنگى جاعداي ورىن الماۋى ءتيىس ەدى. ويتكەنى، قالا اكىمىمەن كەلىسىم سارسەنبى كۇنى جاسالعان بولاتىن. قازىرگى ۋاقىتتا ءبىزدىڭ اۆتوبۋستار كۇندەلىكتى تارتىپتە جۇمىس ىستەۋدە. حابارلاندىرۋلار الىنىپ تاستالدى، - دەدى الەكساندر پانچەنكو.
بۇگىن وقيعا تۋرالى قالا اكىمىنىڭ باسپا ءسوز قىزمەتى پىكىر ءبىلدىردى.
- جەڭىلدەتىلگەن جولاقى مەن تەگىن ءجۇرۋ قۇقىعى 17 ساناتتاعى ازاماتتار ءۇشىن ساقتالادى. 2020 -جىلى قالالىق بيۋدجەتتە تاسىمالداۋشىلار شىعىنىن وتەۋ ءۇشىن قارجى قاراستىرىلعان. ول قارجى بەلگىلى ساناتتاعى ازاماتتاردى جەڭىلدىكپەن جانە تەگىن تاسىمالداۋدى جۇزەگە اسىراتىن ۇيىمدارعا بەرىلەدى. 8 تاسىمالداۋشىنىڭ ىشىندە بولىنگەن قارجىمەن تەك №1، 1ە، 2، 9، 18، 27 باعىتتاردا قىزمەت كورسەتەتىن «پاۆلودار اۆتوكومبيناتى» ج ش س كەلىسپەدى. اتالعان باعىتتاردا تاسىمالداۋ كەلىسىمشارتقا سايكەس كۇندەلىكتى تارتىپپەن جۇزەگە اسۋدا. ياعني، بەلگىلى ساناتتاعى ازاماتتار ءوز جەڭىلدىگىن پايدالانا الادى، - دەدى باسپا ءسوز قىزمەتىندە.
بۇگىن وبلىس باسشىسى پاۆلودار قالاسىنىڭ اكىمى قايرات نۇكەنوۆكە قالانىڭ سانيتارلىق تازالاۋ جۇمىستارىن تومەن دەڭگەيدە جۇرگىزگەنى جانە قارىم- قاتىناس ماسەلەلەرىندەگى، اتاپ ايتقاندا، تاسىمالداۋشىلار مەن تۇرعىندار اراسىندا ۇيلەستىرۋدىڭ ماردىمسىزدىعى ءۇشىن سوگىس بەردى.
ەسكە سالايىق، بۇعان دەيىن وبلىس ورتالىعىندا تاسىمالداۋمەن اينالىساتىن پاۆلودارلىق فيرمالار قالا اكىمىنە اشىق حات جازىپ، 2020 -جىلدىڭ 1-ناۋرىزىنان باستاپ 7-ساناتتاعى ازاماتتار ءۇشىن جەڭىلدىكتەن باس تارتاتىنىن مالىمدەگەن بولاتىن. ولاردىڭ اراسىندا زەينەتكەرلەر، ەكىنشى توپتاعى مۇگەدەكتەر، مەكتەپ جاسىنداعى بالالار، كوپبالالى وتباسىنىڭ ستۋدەنتى، كوپبالالى انالار، 23 جاسقا دەيىنگى جەتىمدەر، ستۋدەنتتەر، ا ا ك الاتىندار بار.