ونىڭ ايتۋىنشا، باسىنا قيىن- قىستاۋ كۇن تۋعاندا بايتاق قازاق دالاسىنا كوشىپ كەلگەندەر كوپ.
سونىڭ ىشىندە ستاليندىك زۇلمات زامان ۇستەمدىك قۇرعان وتكەن عاسىردىڭ وتىزىنشى جىلدارى كارىس ۇلتىنىڭ وكىلدەرى دە قازاق جەرىنە دەپورتاتسيالاندى.
ءوز جەرىنەن قۋعىنعا ۇشىراعاندار قاتارىندا يۋننىڭ دە وتباسى بولدى. ءبىر ءتۇننىڭ ىشىندە تۇتاستاي اۋىلدى ەشتەڭە ايتپاستان، پويىزعا تيەپ، الىپ كەتكەن. مال تاسيتىن ۆاگونداردا ەڭبەكتەگەن سابيدەن باستاپ ەڭكەيگەن كارىگە دەيىن ادام ايتقىسىز اۋىر كۇي كەشىپ، ءبىر اي جول جۇرگەن. جولدا بىردە- ءبىر ستانساعا ايالداماستان، قاراعاندىعا جەتكىزگەن.
«جەرگىلىكتى حالىققا «حالىق جاۋلارىن» اكەلە جاتقاندارىن ايتىپ، ەشكىمگە قولۇشىن بەرمەۋگە بۇيرىق بەرگەن. مىنە، سوعان قاراماستان، وزدەرى ءتىپتى اش قۇرساق بولسا دا، قازاقتار قولۇشىن سوزىپ، الدىمەن قاريالار مەن سابيلەردى تاماقتاندىرىپ، ۇيلەرىنە كىرگىزىپ جىلىتتى. شەتكە قاققان جوق، باۋىرىنا تارتتى. سونداي مەيىرىمدى ادامداردىڭ ارقاسىندا ءبارىمىز امان قالدىق. مەن سول كەزدە ءبىر جاستا ەكەنمىن. العاشقى جىلى ءبىزدى قازاقتار ءوز شاڭىراقتارىنا جاتقىزىپ، قامقورلادى. كەلەسى جىلى بىرتىندەپ ءوزىمىز ءۇي سالىپ الىپپىز. سودان بەرى قازاقستاندى مەكەندەپ، ءوز وتانىمىزدا ءومىر ءسۇرىپ كەلەمىز»، دەيدى ۆالەنتين يۋن.
كارىس ۇلتىنىڭ وكىلدەرى بۇل جاقسىلىقتى ۇمىتقان جوق. سونىڭ دالەلىندەي 2012 -جىلى ورالدا «قازاق حالقىنا مىڭ العىس!» اتتى مونۋمەنت ورناتىلدى. جىل سايىن وسى ەسكەرتكىش جانىندا ءتۇرلى شارالار وتەدى.
بيىل دا العىس ايتۋ كۇنىنە وراي اق جايىق جۇرتشىلىعى ەسكەرتكىش جانىنا جيىلىپ، گۇل شوقتارىن قويدى. قازاق حالقىنا دەگەن شىنايى ىنتا- ىقىلاسىن، قۇرمەتىن وسىلايشا ءبىلدىردى.
«ءبىز قازاق حالقىنا ماڭگىلىك قارىزدارمىز. بۇل - بارشا كارىس ۇلتى وكىلدەرىنىڭ پىكىرى. تاۋەلسىز قازاق ەلىنىڭ ودان ءارى وركەندەپ، دامۋىنا ءبىز دە ۇلەسىمىزدى قوسا بەرەتىن بولامىز»، دەپ تۇيىندەدى ويىن ۆالەنتين يۋن.
اۆتور ەلجان ەرالى