ۆولونتەرلەردەن سىيلىققا ءۇي العان اقتوبەلىك قارت كوزىنە جاس الدى

اقتوبە. قازاقپارات - اقتوبە وبلىسى، بايعانين اۋدانى، جارقامىس اۋىلىنىڭ تۇرعىنى تاڭجارباي جاقين باسپانالى بولدى.

باسپانانى اۋىل ۆولونتەرلەرى سىيلادى، دەپ حابارلايدى قازاقپارات ءتىلشىسى.

جارقامىس اۋىلىنىڭ ەرىكتىلەرى قازىر «نۇر شاپاعات» توبىنا بىرىككەن. وتكەن جىلدىڭ جەلتوقسان ايىنان باستاپ جاستار اۋىلداعى مۇقتاج وتباسىلارعا جۇمىلا قامقورلىق كورسەتۋ، جالعىز قالعان قاريالارعا كومەك بەرۋدى ماقسات ەتتى.

«ەل ىشىندە ۆولونتەر قىزمەتى جەتى باعىتتا جۇمىس ىستەپ جاتىر. ءبىز كوبىنە قايىرىمدىلىق باعىتىن تاڭداپ وتىرمىز. توپتىڭ قۇرامىنداعى جاستاردىڭ دەنى نۇروتاندىقتار. وسىعان دەيىن كوپبالالى 18 وتباسىعا كومەك كورسەتتىك. تاياۋدا 65 جاستاعى جالعىزباستى قارياعا اۋىل تۇرعىندارىنىڭ كومەگىمەن باسپانا الىپ بەردىك. ول ءوزى قاراشاڭىراقتا تۇرادى. ءبىراق باسپاناسى اپاتتى جاعدايدا ەدى. ءبىز اۋىل ادامدارىنىڭ، كاسىپكەرلەردىڭ كومەگىمەن اقشا جيناپ، ءۇيدى الىپ، ءىشىن اكتەپ، قاجەتتى جابدىعىن جەتكىزدىك. ۇيدە ورتالىقتاندىرىلعان سۋ مەن گاز بار. ال قاريانى اۋىل اقساقالدارى كوندىرىپ، كوشۋگە كەلىسىمىن الدى»، - دەدى ءۇمىت اقبولات قىزى.

ايتا كەتەيىك، ەرىكتىلەر سونداي-اق قايىرىمدىلىق كونسەرتتەر ۇيىمداستىرىپ، 2 ناۋقاس سابيگە شەتەلدە وپەراتسيا جاساۋعا كومەك بەردى. قىستا جالعىزباستى قاريالاردىڭ اۋلاسىنداعى قاردى كۇرەپ، ءۇيىن اكتەپ، تازالاپ بەرەدى.

«ۆولونتەرلەردىڭ فرونت-كەڭسەسىنىڭ اشىلۋىندا پرەزيدەنتىمىز قاسىم-جومارت توقايەۆ ءبىزدىڭ باستامالارىمىزدى قولدادى. بۇل بىزگە ەرەكشە سەرپىن بەردى، يدەيالارىمىزعا قانات ءبىتىردى. استانادان تىڭ جوسپارلارمەن ورالدىم. ءوزىم اۋىلدا كىتاپحاناشىمىن. ەرىكتىلىك ءبىزدىڭ نەگىزگى جۇمىسىمىزعا كەدەرگى ەمەس. العاشىندا توسىرقاي قاراعاندار بولدى. ءبىراق ۋاقىت وتە كەلە قولداۋشىلار تابىلدى. ءبىز ۇيىمشىلمىز، ءاردايىم بىرگەمىز. العا جوسپارىمىز كوپ. ناۋقاس بالالاردىڭ ەمىنە قول ۇشىن سوزىپ، اقشا جيناپ بەرگىمىز كەلەدى»، - دەيدى ءۇمىت اقبولات قىزى.