بالا يممۋنيتەتىن قالاي كوتەرۋگە بولادى؟

نۇر-سۇلتان. قازاقپارات - قىستان كوكتەمگە وتەر ۋاقىت كوپشىلىگىمىز ءۇشىن ازداپ قيىندىق تۋعىزادى.

سەبەبى السىزدىك، تۇماۋدىڭ كوبەيۋى، يممۋنيتەتتىڭ تومەندەۋى سەكىلدى دەرتتەر مازالايتىنى انىق. ال بالانىڭ يممۋندى جۇيەسىنىڭ جۇمىس دەڭگەيىن انىقتاپ، وعان يممۋندى كوتەرەتىن دارۋمەندەردىڭ قانشالىقتى قاجەت ەكەنىن انىقتاۋ دا اسا قيىن ەمەس. سول سەبەپتى ءوز يممۋنيتەتىڭىزدى ءوزىڭىز دە بولجاي الاسىز. يممۋنيتەتتىڭ تومەندەۋىن بىلدىرەتىن بەلگىلەر:

- بالا ءجيى اۋىرادى. جىلىنا 6 رەت، ودان دا كوپ سۋىقتايدى؛

- سۋىق تيۋ وزگەلەرگە قاراعاندا اۋىر تۇردە وتەدى. سوڭى باسپا مەن قۇلاق قابىنۋى سياقتى قيىن جايلارعا ۇلاسادى؛

- ەمدەۋ شاراسى ادەتتەگىدەن دە ۇزاققا سوزىلادى، ونىڭ اۋرۋدان ايىعۋى قيىنعا تۇسەدى.

وسىنداي بەلگىلەر بالانىڭ بويىنان بايقالسا، دارىگەرگە جۇگىنگەن ءجون. ەڭ الدىمەن، يممۋنيتەتتىڭ دۇرىس قالىپتاسۋىنا جاعداي جاسالعان- جاسالماعاندىعى انىقتالادى. ول ءۇشىن نەگىزگى تەكسەرۋدەن ءوتۋى ءتيىس. ماسەلەن قان تالداۋى، نەسەپ تالداۋى، بيوحيميالىق قان تالداۋى جانە ىشەكقۇرت پەن ديسباكتەريوزعا ۇلكەن دارەت تالداۋى الىنادى.

سونىمەن قاتار، لور دارىگەرگە تەكسەرتىپ، كەي جاعدايلاردا قۇرساق قۋىسى مۇشەلەرىن ۋدز قۇرىلعىسىمەن تەكسەرەدى. يممۋندىق جۇيەنىڭ دەڭگەيىن باعالاۋ كۇردەلى جۇمىس. ونى تەك ارنايى مامان عانا ايقىندايدى.

دەگەنمەن، دۇرىس تاماقتانۋ، اعزانى شىنىقتىرۋ، دارۋمەندەر كەشەنى مىندەتتى تۇردە قاتار تاعايىندالادى. اۋرۋمەن كۇرەسۋ بالالار مەن ەرەسەكتەردىڭ يممۋنيتەتىن نىعايتۋدا اعزانى شىنىقتىرۋ ەڭ ءتيىمدى ءادىس بولىپ سانالادى. ونى بالالاردىڭ 3-4 جاسىنان باستاپ-اق ويىن تۇرىندە جۇرگىزۋگە بولادى. ەشقاشان بالا اعزاسىن ونىڭ ەركىنەن تىس، كۇشپەن شىنىقتىرۋعا بولمايدى. اعزانى شىنىقتىرۋدى تاڭعى جاتتىعۋلاردان باستايدى. الايدا بۇل ءۇشىن بالا ۇيقىسى قانىق، سەرگەك بولۋى ماڭىزدى.

بالانىڭ قارقىندى جاتتىعۋى ءۇشىن اتا-اناسى دا ونىمەن بىرگە دەنە قيمىلدارىن جاساعانى ءجون.10-15 مينۋتتىق جەڭىل دەنە جاتتىعۋىنان سوڭ، سۋمەن شىنىعۋعا اۋىسۋعا بولادى. 3-4 مينۋت سۋمەن كەۋدەنى، قول مەن مويىندى سۋلايدى. باستاپقى كەزدە سۋ شارالارى ءۇشىن بولمە تەمپەراتۋراسىنداعى (22-25 گرادۋس) سۋدى قولدانعان دۇرىس. بىرتە- بىرتە ونى سالقىنداتىپ، 18-16 گرادۋسقا تۇسىرەدى. سۋمەن سىلاعان سوڭ دەنەنى قۇرعاق سۇلگىمەن ءسۇرتىپ، سودان سوڭ بىرنەشە ۋاقىت دەنەنى ىسقىلاپ قىزدىرادى. سونىمەن قاتار سۋمەن شىنىقتىرۋ كەزىندە بالانىڭ توڭىپ قالماۋىن جانە سوڭىنان جىلى كيىنۋىن قاداعالاۋ كەرەك. يممۋنيتەتتى كوتەرۋگە ارنالعان دارمەكتەر

ينتەرفەروندار توبى. ينتەرفەرون - اعزادا ۆيرۋستى ينفەكتسيالاردىڭ دامۋىن تەجەيتىن بيولوگيالىق بەلسەندى زات. ونىڭ اسەرى اسىرەسە وتكىر رەسپيراتورلى ۆيرۋستى ينفەكسيلار كەزىندە اسا قاجەت. ينتەرفەرون توبىنىڭ دارمەكتەرىن سىرقاتتىڭ العاشقى ساتىسىنان باستاپ تەز ارادا قابىلداسا، ناتيجەسى قۋانتارلىق بولادى.

2. يممۋنيتەتتى نىعايتۋعا ارنالعان باكتەريا تەكتەس دارمەكتەر. ولاردىڭ قۇرامىندا اعزاعا زيانسىز، ءبىراق يممۋنيتەتتى ىنتالاندىرعىش ستافيلوكوكك، گەموفيل تاياقشالارى، پنيەۆموكوكك، سترەپتوكوكك سياقتى ينفەكتسيالاردى قوزدىرعىش باكتەريالار بار. باكتەريا تەكتەس دارمەكتەر جەرگىلىتى عانا ەمەس، جالپى اعزا يممۋنيتەتىن ىنتالاندىرۋعا قابىلەتتى.

وتكىر رەسپيراتورلى اۋرۋلاردا، تاماق، مۇرىن، قۇلاقتىڭ سوزىلمالى اۋرۋلارىندا فارينگيت، تونزيلليت، سينۋسيت، ت. ب. يممۋنيتەتكە قوسىمشا كۇش بەرەدى.

3. وسىمدىكتەردەن دايىندالعان يممۋندى ىنتالاندىرعىش سىعىندىلار. قىزىلكۇرەڭ ەحيناتسيا سىعىندىسى - يممۋنال جانە ادامتامىر، قىتاي سەرمەنەسى، ت. ب. دايىندالعان دارمەكتەر. ولاردىڭ بارلىعى يممۋندى ىنتالاندىرعىش، گەندى بەيىمدەگىش قاسيەتى بار وسىمدىكتەر.

دەرەككوز: massaget.kz