الماتىدا ءال- فارابي مەن ابايدىڭ مەرەيتويلارىنا ارنالعان دوڭگەلەك ۇستەل ءوتتى
شارانى ءال- فارابي ورتالىعى مەن ءال- فارابي اتىنداعى قازۇۋ- دىڭ فيلوسوفيا جانە ساياساتتانۋ فاكۋلتەتى ۇيىمداستىردى.
دوڭگەلەك ۇستەل بارىسىندا ۇلى تۇلعالاردىڭ ءومىرى مەن مادەني شىعارماشىلىعىنا قاتىستى عىلىم مەن ءبىلىم بەرۋدىڭ ءادىسنامالىق جانە پراكتيكالىق ماسەلەلەرى تالقىلاندى.
ءال- فارابي ورتالىعىنىڭ عىلىمي كەڭەسشىسى جاقىپبەك التايەۆتىڭ ايتۋىنشا، ءال- فارابي دە، اباي دا - ەڭ الدىمەن ۇستاز، اعارتۋشىلار. ولاردىڭ بۇكىل ىزدەنىستەرى مەن پايىمداۋلارى ادامدى بارىنشا كەمەلدەندىرۋ، دامىتۋ ماقساتىنا ارنالعان. ءال- فارابي ادامداردى شىنايى باقىتقا جەتكىزۋ جولدارىن مۇرات تۇتسا، اباي تولىق، كەمەل ادام تاربيەلەپ شىعارۋدى ماقسات ەتكەن.
«ءال- فارابي مەن اباي ينتەللەكتۋال. ارالارىندا مىڭ جىلدىق ايىرماشىلىق بولسا دا، ولاردىڭ ويلارىندا، پىكىرلەرىندە، كوزقاراستارىندا كوپ ۇقساستىق بار. سەبەبى، ەكەۋى دە ۇلى ادامدار. ارينە، بۇل جەردە فارابي ابايدى وقىتتى دەپ ايتۋعا بولمايدى، بىزدە دالەل جوق. ءبىراق، ونداي وي نەگە كەلدى. اباي سوكراتتى، پلاتوندى، اريستوتەلدى وقىدى. ال، ءال- فارابي انتيكالىق فيلوسوفتاردىڭ ەڭبەكتەرىنە تۇسىنىكتەمە جازعان ادام. ولاردىڭ ەتنيكالىق كوزقاراستارى دا وتە ۇقساس. مىسالى باقىت پەن ءدىن جاعىنان ويلارى ءبىر جەردەن شىققان» ، - دەيدى جاقىپبەك التايەۆ.
دوڭگەلەك ۇستەل جۇمىسىنا فارابيتانۋشى، ابايتانۋشى عالىمدار مەن قوعام قايراتكەرلەرى، عىلىمي قىزمەتكەرلەر، دوكتورانتتار، ماگيسترانتتار قاتىستى.