الماتىدا اباي مۇراجايىنىڭ كورمەسى اشىلدى
كورمە ءال-فارابي اتىنداعى قاز ۇ ۋ-دەگى اباي زالىنا قويىلدى. وندا حاكىم ابايدىڭ شىعارماشىلىعى، وسكەن ورتاسى، ءومىر سۇرگەن زامانى تۋرالى مالىمەتتەر مەن ۇلى اقىن ومىرىنەن سىر شەرتەتىن اسا باعالى اقپاراتتار بار.
سونىمەن قاتار، كورەرمەندەر نازارىنا 1885 -جىلى تاريحي ولكەتانۋ مۋزەيىنە اباي قۇنانباي ۇلىنىڭ ءوز قولىمەن تابىستاعان اسا قۇندى جادىگەرلەرى ۇسىنىلدى. اباي مۋزەيىنىڭ قورىنداعى اقىننىڭ ءتۇپنۇسقا ەكى فوتوسۋرەتىن، ارحيۆتىك قۇجاتتار مەن قولجازبالارىن تاماشالاۋعا بولادى.
«بۇگىنگى تاڭدا مۋزەيدىڭ نەگىزگى قورىندا 11 مىڭنان اسا ەكسپونات بار. سولاردىڭ اراسىندا ابايدىڭ بەينەسى بار ەكى فوتوسۋرەت، پ. د. لوبانوۆسكيدىڭ اقىننىڭ كوزى تىرىسىندە قارىنداشپەن سالعان پورترەتى، ابايدىڭ 1896 -جىلى ۇلى ماعاۋياعا جازعان حاتى، 1885 -جىلى ن. ي. دولگوپولوۆ ارقىلى سەمەيدەگى ولكەتانۋ مۋزەيىنە تاپسىرعان زاتتار، ماسكەۋ، لەنينگراد، ومبى، توم، قازان قالالارىنىڭ جانە قازاقستان مۇراعاتتارىنان تابىلعان ابايدىڭ ءومىرى، اتقارعان قىزمەتى، تۋىستارى مەن زامانداستارىنا قاتىستى ارحيۆ دەرەكتەرى، اباي وقىعان مەدرەسەنىڭ اراب، تۇرىك، شاعاتاي تىلدەرىندەگى كىتاپتارى مۋزەيدىڭ باعا جەتپەس قۇندى دۇنيەسى»، - دەيدى ابايدىڭ «جيدەباي- ءبورىلى» مەملەكەتتىك قورىق- مۋزەيىنىڭ عىلىمي حاتشىسى راۋشان ەلەكەنوۆا.
ۇيىمداستىرۋشىلاردىڭ ايتۋىنشا، كورمەنىڭ باستى ماقساتى - ابايدىڭ دۇنيەتانىمىن جانە ونىڭ رۋحاني مۇراسىن جاستارعا كەڭىنەن ناسيحاتتاۋ.