قار، كوكتايعاق، جەل - سەيسەنبىگە ارنالعان اۋا رايى

نۇر-سۇلتان. قازاقپارات - سەيسەنبىدە ەلىمىزدىڭ كوپ بولىگىندە قار جاۋىپ، جەل كۇشەيەدى، كوكتايعاق بولادى، بوران سوعۋى مۇمكىن، دەپ حابارلايدى قازاقپارات قازگيدرومەتكە سىلتەمە جاساپ.

«11 - اقپاندا ەلىمىزدىڭ باسىم بولىگىندە اتموسفەرالىق اعىنداردىڭ وتۋىنە بايلانىستى كەي جەرلەردە قار جاۋادى، وڭتۇستىكتە، وڭتۇستىك-شىعىستا جاۋىن-شاشىن (جاڭبىر، قار)، وڭتۇستىكتە تۇندە كەي جەرلەردە قالىڭ قار تۇسەدى. كەي جەرلەردە جەل كۇشەيىپ، بۇرقاسىن سوعادى، كوكتايعاق بولىپ، تۇمان ءتۇسۋى ىقتيمال. قازاقستاننىڭ باتىس، وڭتۇستىك-باتىس وبلىستارى انتيتسيكلون ىقپالىندا بولعاندىقتان كۇن رايى اشىق بولادى»، دەلىنگەن بولجامدا.

شىعىس قازاقستان وبلىسىندا جەل 15-20 م/س كۇشەيەدى، كەي جەرلەردە جاياۋ بۇرقاسىن سوعادى، تۇمان، كوكتايعاق كۇتىلەدى.

الماتى، جامبىل، تۇركىستان، قاراعاندى وبلىستارىنىڭ كەي جەرلەرىندە تۇمان، كوكتايعاق، جامبىل، تۇركىستان وبلىستارىندا جەل 15-20 م/س كۇشەيەدى. اقمولا وبلىسىنىڭ كەي جەرلەرىندە تۇمان، بۇرقاسىن، جەلدىڭ جىلدامدىعى 15-20 م/س جەتەدى.

سولتۇستىك قازاقستان وبلىسىنىڭ كەي جەرلەرىندە جاياۋ بۇرقاسىن سلوعادى، كۇندىز كەي جەرلەردە جەل 15-20 م/س كۇشەيەدى.

قىزىلوردا، ماڭعىستاۋ، باتىس قازاقستان، اقتوبە، قوستاناي، پاۆلودار وبلىستارىنىڭ كەي جەرلەرىندە تۇمان كۇتىلەدى.