پاۆلوداردا ابايعا ەسكەرتكىش ورناتىلادى
بۇل تۋرالى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا وبلىستىق مادەنيەت، تىلدەردى دامىتۋ جانە ارحيۆ ىستەرى باسقارماسىنىڭ باسشىسى ەرنۇر داۋەنوۆ ءمالىم ەتتى.
«قازاقستان رەسپۋبليكاسىندا ورناتىلاتىن ەسكەرتكىشتەر مەن مونۋمەنتتەر بويىنشا مەملەكەتتىك كوميسسيا اباي ەسكەرتكىشىنىڭ ەسكيزىن بەكىتتى. اۆتورى - اسقار نارتوۆ. ەسكەرتكىش ورناتىلاتىن جەر وبلىستاعى ارداگەرلەر مەن سۋرەتشىلەردىڭ قاتىسۋىمەن تاڭدالدى»، - دەيدى ەرنۇر داۋەنوۆ.
ونىڭ ايتۋىنشا، وقۋشىلار سارايىنىڭ الدىندا ادامدار دەمالاتىن جايلى ورىندار بار. مۇنداعى نەگىزگى يدەيا - وقۋشىلاردىڭ ساناسىنا اقىننىڭ مۇراسىن ءسىڭىرۋ. سۋرەتشى سوڭعى ەسكيزدەرىن ءبىر ايدىڭ كولەمىندە ۇسىنادى. سول كەزدە بيىكتىگى تۋرالى جانە باسقا دا تولىق اقپارات بەرىلەدى. قالالىق اكىمدىكتىڭ شەشىمىمەن 2020 -جىلدىڭ بيۋدجەتىنە اباي كوشەسىن اباتتاندىرۋ جۇمىستارى ەنگىزىلگەن. ارنايى باستاماشىل توپ قۇرىلىپ، جەكە مەنشىك ۇيلەردىڭ سىرتىنداعى ورامداردى جوندەۋ بويىنشا كەلىسسوزدەر جۇرگىزەتىن بولادى.
«ەسكەرتكىش نۇر-سۇلتان قالاسىندا قۇيىلادى. ساۋلەتشىمەن كەلىسىمشارت جاسالۋدا. ءمۇسىن مەن تۇعىردى قۇيۋعا، كورىكتەندىرۋگە جابدىقتاۋشى جاۋاپ بەرەدى»، - دەپ اتاپ ءوتتى ەرنۇر داۋەنوۆ.
ايتا كەتەر جايت، بۇل اسقار نارتوۆ دايىنداعان ابايدىڭ ەكىنشى ءمۇسىنى. العاشقىسى قاراعاندى قالاسىنا ورناتىلعان بولاتىن.