قاراعاندىدا قۇس سالۋدان رەسپۋبليكالىق تۋرنيرگە قاتىساتىن بۇركىتشىلەر ىرىكتەلدى

قاراعاندى. قازاقپارات - قاراعاندىدا اۋشى قۇستارمەن اڭ اۋلاۋ بويىنشا رەسپۋبليكالىق تۋرنيردىڭ قاتىسۋشىلارى تاڭدالدى.

اتالمىش دودا وسى اپتانىڭ سوڭىندا سەمەي قالاسىندا وتەدى جانە ابايدىڭ 175 جىلدىق مەرەيتويىنا ورايلاستىرىلعان، دەپ حابارلايدى قازاقپارات ءتىلشىسى.

رەسپۋبليكالىق تۋرنيرگە قاتىسۋ ءۇشىن بۇركىتشىلەر قاراعاندى وبلىسىنىڭ چەمپيوناتىندا ءوز شەبەرلىگىن دالەلدەۋى ءتيىس. باسەكە «كارات» ات زاۋىتى اۋماعىندا ءوتتى. قاتىسۋشىلار اۋشى قۇستارمەن اڭ اۋلاۋ شەبەرلىگىن كورسەتتى، ولار جارىسقا ءوز بۇركىتىن، سۇڭقارى مەن قارشىعاسىن الا كەلدى.

سۇڭقارلار مەن قارشىعالار تۇلكى تۇلىبىن ۇستاۋدان جارىسسا، بۇركىتتەر ءتىرى قويان اۋلادى.

بۇركىتشىلەر اراسىندا ءبىرىنشى ورىندى اقجەلكەن اتتى بۇركىتتىڭ يەسى، قاراعاندىلىق چەمپيون تەمىرالى تولەگەن ۇلى جەڭىپ الدى. ەكىنشى ورىندى بۇركىتشىلەر وتباسىنىڭ ءۇشىنشى ۇرپاعى اسان ءابدىرازاقوۆ پەن شەت اۋدانىنان كەلگەن سارىارقا قۇسى يەلەندى. ءۇشىنشى ورىن بۇقار جىراۋ اۋدانىنىڭ وكىلى جاراس دوسوۆ جانە ونىڭ اقبەت اتتى قۇسىنا بەرىلدى. قارشىعامەن اڭ اۋلاۋدا ەرعازى ەراسىل جانە ونىڭ سوگەت اتتى قارشىعاسى ۇزدىك بولدى. ەكىنشى ورىندى تاڭات وسپانقۇلوۆ پەن جەبە اتتى قارشىعا يەلەندى. ءۇشىنشى ورىن نۇرداۋلەت ەگىنتاي مەن ونىڭ بيدايىق اتتى قۇسىنا بۇيىردى.

تورەشىلەردىڭ شەشىمىمەن سەمەي قالاسىندا وتەتىن رەسپۋبليكالىق تۋرنيرگە تەمىرالى تولەگەن ۇلى، اسان ءابدىرازاقوۆ جانە اۋشى قۇستارمەن اڭ اۋلاۋ بويىنشا وبلىستىڭ اعا جاتتىقتىرۋشىسى تولەگەن ماحامبەتشين اتتانادى. ەل بىرىنشىلىگىندە قارشىعامەن اڭ اۋلاۋدا ەرعازى ەراسىل ءوز شەبەرلىگىن كورسەتەدى.

ەكىنشى اقپاندا «قايرات» ۇلتتىق جانە ات سپورتى تۇرلەرى ب ج س م ات- سپورت بازاسىنىڭ اۋماعىندا تازى تۇقىمدى يتتەردى تىركەۋ جانە ءتولقۇجاتتاردى سالتاناتتى تۇردە تاپسىرۋ ءراسىمى ءوتتى. شارادان كەيىن يتتەر جۇگىرىپ جارىستى. «ارلان» نوميناتسياسى بويىنشا اباي اۋدانىنان كەلگەن مايلاق دەگەن تازى مەن ونىڭ يەسى امانتاي تولەگەن جەڭىمپاز اتاندى. ەكىنشى ورىندا - اننا زاحاروۆا مەن قاراعاندىلىق دجەك ەسىمدى يت. ءۇشىنشى ورىندى بۇقار جىراۋ اۋدانىنىڭ وكىلدەرى يەلەندى.

«ۇرعاشى» نوميناتسياسى بويىنشا شەت اۋدانى مەن قاراعاندى قالاسىنىڭ قاتىسۋشىلارى ۇزدىك اتاندى.

كۇشىكتەر اراسىندا نۇرا اۋدانى، تەمىرتاۋ، اقتوعاي اۋدانىنان كەلگەن قاتىسۋشىلار جەڭىمپاز اتاندى.

چەمپيوناتقا 100 دەن استام تازى تۇقىمدى يت قاتىستى. جارىستى «قايرات» ۇلتتىق جانە ات سپورتى تۇرلەرىنىڭ ب ج س م باسشىسى، قاراعاندى وبلىسىنىڭ ۇلتتىق جانە ات سپورتى تۇرلەرى فەدەراتسياسىنىڭ پرەزيدەنتى شاريزات قازتايەۆ ۇيىمداستىردى.