ەۋروپارلامەنت دەلەگاتسياسى رەسمي ساپارمەن قازاقستانعا كەلەدى
دەلەگاتسيا پارلامەنتتىك ىنتىماقتاستىق كوميتەتىنىڭ «قازاقستان - ەۋرووداق» وتىرىسىنا قاتىسادى، دەپ حابارلايدى قازاقپارات.
بۇل جونىندە قازاقستاننىڭ بەلگياداعى توتەنشە جانە وكىلەتتى ەلشىسى ايگۇل قۇسپان ەۋروپارلامەنتتىڭ ورتالىق ازيا ەلدەرىمەن بايلانىس جونىندەگى دەلەگاتسياسىنىڭ وتىرىسىندا مالىمدەدى.
قۇرمەتتى قوناقتاردى يتاليالىق دەپۋتات فۋلۆيو مارتۋشەللو باستاپ كەلەدى. ەۋروپا پارلامەنتاريلەرى ماجىلىستەگى ارىپتەستەرىمەن ورتاق تاقىرىپتاردى تالقىلايدى.
ودان بولەك، ەۋرودەپۋتاتتار سىرتقى ىستەر، ەنەرگەتيكا، يندۋستريا جانە ينفراقۇرىلىمدىق دامۋ، ەكولوگيا، گەولوگيا جانە تابيعي رەسۋرستار مينيسترلىكتەرىنىڭ باسشىلارىمەن جانە باس پروكۋرورمەن كەزدەسەدى. سونداي-اق، قازاقستانداعى ەۋرووداق وكىلدىگى ۇيىمداستىرعان شاراعا قاتىسىپ، ەلىمىزدەگى ادام قۇقىقتارى جونىندەگى ۋاكىلمەن اڭگىمە-دۇكەن قۇرادى.
«ءبىز قاراعاندىعا بارۋدى جوسپارلاپ وتىرمىز. ول جەردە مەيماندار قاراعاندى وبلىسىنىڭ باسشىلىعىمەن جانە قاراعاندى مەملەكەتتىك ۋنيۆەرسيتەتىنىڭ ستۋدەنتتەرىمەن كەزدەسەدى»، - دەيدى ايگۇل قۇسپان.
ەۋروپارلامەنت دەپۋتاتتارى دولينكا كەنتىندەگى ساياسي قۋعىن-سۇرگىن قۇرباندارىن ەسكە الۋعا ارنالعان مۋزەيگە (كارلاگ) سوعىپ، قاراعاندى وبلىسىنداعى قازاقستان حالقى اسسامبلەياسىنىڭ وكىلدەرىمەن پىكىر الماسادى.
«دۇنيەجۇزىلىك ساۋدا ۇيىمىنىڭ مينيسترلىك كونفەرەنتسياسى قارساڭىندا، ياعني بيىلعى 6-7- ماۋسىمدا ەۋروپارلامەنتتىڭ تاعى ءبىر دەلەگاتسياسى قازاقستانعا كەلەدى»، - دەپ قوسىپ ءوتتى قازاقستاندىق ديپلومات.
ماۋسىمدا كەلەتىن قوناقتاردى نەمىس دەپۋتاتى، ەۋروپارلامەنتتىڭ حالىقارالىق ساۋدا جونىندەگى كوميتەتىنىڭ باسشىسى بەرند لانگە باستاپ كەلەدى.
ەۋروپالىق دەپۋتاتتار قازاقستانعا ساپار قازاقستان مەن ەۋروپالىق وداق اراسىنداعى بايلانىستى نىعايتا تۇسەدى دەگەن سەنىمدە.
«قازاقستانعا ساپار - ەۋروپارلامەنتتىڭ جاڭا قۇرامى ءۇشىن ماڭىزدى قادام بولماق. ءبىز قازاقستاندى وسى ءوڭىردى دامىتۋداعى قوزعالتقىش كۇش دەپ سانايمىز. ءبىز بۇل ەلگە قازاقستان پرەزيدەنتى قاسىم-جومارت توقايەۆتىڭ بريۋسسەلگە ساپارىنان كەيىن 10 كۇننەن كەيىن بارامىز. بۇگىندە توقايەۆ رەفورمامەن جانە ءوزىنىڭ سايلاۋ الدىندا بەرگەن ۋادەلەرىن ورىنداۋمەن بەلسەندى تۇردە اينالىسىپ جاتىر. ەۋرووداق پارلامەنتاريلەرى قازاقستان پرەزيدەنتىنىڭ رەفورمالارىن قولدايدى جانە ولاردى جۇزەگە اسىرۋعا كومەگىن ايامايدى»، - دەپ اتاپ ءوتتى لاتۆيالىق ەۋروپارلامەنت دەپۋتاتى اندريس امەريكس.