ىستانبۇلدا قازاق ءتىلى كۋرسى اشىلدى

ىستانبۇل. قازاقپارات - ىستانبۇلدا قازاق ءتىلىن وقىتاتىن كۋرس اشىلدى.

KATEAD قاۋىمداستىعى مەن «وتانداستار» قورى اراسىندا 2019-جىلعى 21- مامىردا قول قويىلعان حاتتاما نەگىزىندە اشىلعان بۇل كۋرس ونلاين رەجىمدە وتەدى ءارى تەگىن بولادى، دەپ حابارلايدى قازاقپارات.

«كۋرسقا قاجەتتى جابدىقتار 2019-جىلدىڭ 10- جەلتوقسانىندا قازاقستاننان جونەلتىلدى. قازاق ءتىلى كۋرسى ىستانبۇلدىڭ ەكى ايماعىندا ۇيىمداستىرىلادى: ءبىرىنشىسى زەيتينبۋرن اۋدانىندا، ال ەكىنشىسى باعدجىلار اۋدانىندا. بۇل ەكى جەر تۇركيا قازاقتارىنىڭ كوپ قونىستانۋىنا بايلانىستى تاڭدالدى. باعدجىلار اۋدانىندا كۋرس قازاقتار نەگىزىن قالاعان قوجا احمەت ياساۋي ءبىلىم جانە ايماقتىق قورىنىڭ عيماراتىندا وتەدى. بۇل ءۇشىن KATEAD قاۋىمداستىعى مەن قوجا احمەت ياساۋي قورى اراسىندا 3 جىل مەرزىمگە ارنالعان حاتتاماعا قول قويىلىپ، قازاقستاننان جەتكىزىلگەن دارىستەرگە ارنالعان جابدىقتار سول جەرگە دە اپارىلدى»، - دەيدى KATEAD ءتوراعاسى ەرتولقىن گايرەتۋللاح.

ساباق Microsoft Teams باعدارلاماسى ارقىلى تىكەلەي ەفيردە جۇرگىزىلەدى. وقۋ باعدارلاماسى وقۋ، تىڭداۋ جانە سويلەۋ داعدىلارىن جەتىلدىرۋگە ارنالعان شىعارماشىلىق تاپسىرمالارى بار 45 ينتەراكتيۆتى ساباقتان تۇرادى. ساباق ناتيجەسى بويىنشا مەكتەپ جاسىنداعى وقۋشىلار قازاقستان رەسپۋبليكاسىنداعى جازعى لاگەرلەرگە دە جىبەرىلەدى.

«بۇل شارا تۇركيادا تۇراتىن قازاقتاردىڭ اتاجۇرتپەن بايلانىسىن نىعايتارى ءسوزسىز. ءارى وسىندا تۋىپ-وسكەن، قازاق ءتىلىن جەتىك مەڭگەرگىسى كەلەتىن قانداستارىمىز ءۇشىن دە ۇلكەن مۇمكىندىك. ءبىز «وتانداستار قورىنىڭ» ءتوراعاسى نۇرتاي ابىقايەۆ مىرزاعا، دۇنيەجۇزى قازاقتارى قاۋىمداستىعىنىڭ ءبىرىنشى ورىنباسارى زاۋىتبەك تۇرىسبەكوۆ مىرزاعا جانە وسى مۇمكىندىكتى تۋدىرعان بارلىق ازاماتتارعا العىسىمىزدى بىلدىرەمىز. ءبىز، قاۋىمداستىق رەتىندە، قازاق مادەنيەتى مەن ءتىلى ءۇشىن قارقىندى جۇمىس ىستەۋدى جالعاستىرا وتىرىپ، وسىنداي ءىس-شارالاردىڭ ناتيجەسىندە قازاق مادەنيەتى مەن ءتىلىن ساقتاپ قالا الامىز دەپ سەنەمىز»، - دەيدى KATEAD ءتوراعاسى ەرتولقىن گايرەتۋللاح.