ءۇندىستاندا ءبىر ادام جاڭا كوروناۆيرۋستى جۇقتىردى

نيۋ-دەلي. قازاقپارات - ءۇندىستاننىڭ كەرالا شتاتى تريسسۋر وكرۋگىندە جاڭا كوروناۆيرۋس جۇقتىرعان ءبىر ادام تىركەلدى.

ۆيرۋس تاياۋدا قىتايدىڭ ۋحان قالاسىنان كەلگەن ءۇندىستاندىق ستۋدەنتتەن تابىلدى. ول ۋحان ۋنيۆەرسيتەتىندە وقيدى. زەرتتەۋ ناتيجەسى جاڭا كوروناۆيرۋسقا وڭ ناتيجە بەرگەن. ناۋقاس ستۋدەنتتىڭ جاعدايى تۇراقتى، ول وقشاۋلانعان جەردە تولىقتاي باقىلاۋعا الىندى، دەپ حابارلايدى India Today.

كەرالا دەنساۋلىق ساقتاۋ ءمينيسترى ك. ك. شايلايانىڭ ايتۋىنشا، 20 سىناما زەرتتەۋگە جىبەرىلگەن، سونىڭ ءبىرى جاڭا كوروناۆيرۋس جۇققانىن راستاعان.

«ناۋقاس قىتايدان كەلگەن، قازىر تريسسۋر وكرۋگىندەگى اۋرۋحانادا جاتىر. جاعدايى تۇراقتى»، - دەپ حابارلادى مينيستر.

«ءبىز بارلىق اۋرۋحانالارعا، سونىڭ ىشىندە جەكە اۋرۋحانالارعا دا وسىنداي بەلگىلەرى بار (كوروناۆيرۋس) ناۋقاستاردى ءجىتى قاداعالاۋ كەرەكتىگىن تاپسىردىق. دەنساۋلىق ساقتاۋ دەپارتامەنتى ناۋقاستى وقشاۋلاپ، ەمدەۋدى باستاۋعا دايىن»، - دەدى كەرالا دەنساۋلىق ساقتاۋ ءمينيسترى.

Reuters اگەنتتىگىنىڭ مالىمەتىنشە، ءۇندىستان ۇكىمەتىندەگى شەندى شەنەۋنىكتەردىڭ ءبىرى ءۇندىستاندىق ازاماتتاردى كوروناۆيرۋستىڭ وشاعى ۋحان قالاسىنان ەلگە اكەلۋ اۋرۋ جۇقتىرۋ قاۋپىنە بايلانىستى ءتيىمدى جول ەمەستىگىن ايتقان.

وسى اپتادا ءۇندىستان ۋحانعا ۇشۋ ءۇشىن ۇشاق ازىرلەگەن، ءبىراق قىتاي بيلىگىنىڭ ماقۇلداعانىن كۇتكەن.

«ۆيرۋسى جوق ازاماتتار عانا ەۆاكۋاتسيالانادى، ولاردى دەلي سىرتىنداعى كارانتين ورتالىعىنا جەتكىزەدى»، - دەدى اتىن اتاعىسى كەلمەگەن شەنەۋنىك.

بۇدان بۇرىن حابارلانعانداي، دۇنيەجۇزىلىك دەنساۋلىق ساقتاۋ ۇيىمى (د د س ۇ) 2019-nCoV كوروناۆيرۋسىنىڭ تارالۋىنا بايلانىستى جاھاندىق توتەنشە جاعداي جاريالاعان بولاتىن. وتكەن تاۋلىكتە قىتايدا جاڭا كوروناۆيرۋستان قازا تاپقاندار سانى 43 ادامدى قۇرادى. 1982 ادام اۋرۋ جۇقتىرعان.