ەۋروپانىڭ ەكى قالاسىندا اباي اتىنداعى مادەني- اقپارات ورتالىعى اشىلادى

نۇر- سۇلتان. قازاقپارات - مادەنيەت جانە سپورت ءمينيسترى اقتوتى رايىمقۇلوۆانىڭ ايتۋىنشا، چەح ۇلتتىق كىتاپحاناسىندا جانە بۋداپەشتتە «اباي» مادەني- اقپارات ورتالىعى اشىلىپ قويعان.

ءدال وسىنداي ورتالىق جۋىق ارادا براتيسلاۆا قالالاسىندا اشىلادى، دەپ حابارلايدى قازاقپارات ءتىلشىسى.

«2020 -جىل ابايدىڭ - 175, ءابۋ ناسىر ءال- فارابيدىڭ - 1150 جىلدىعى جانە التىن وردانىڭ قۇرىلعانىنا 750 جىل تولۋى سياقتى ماڭىزدى مەرەكەلىك ءىس- شارالارعا تولى. اباي - حالقىمىزدىڭ كورنەكتى اقىنى جانە ويشىلى، ونىڭ فيلوسوفياسى مادەني جانە ۇلتتىق بىرەگەيلىكتىڭ اجىراماس بولىگىنە اينالدى. مەملەكەت باسشىسى اتاپ وتكەندەي، جالپى رەسپۋبليكالىق جوسپاردىڭ بارلىق ءىس- شارالارى يدەولوگيالىق جانە اعارتۋشىلىق جۇكتەمەنى كوتەرەدى. مەرەيتويدىڭ كۇن ءتارتىبى تۇجىرىمدامالىق تۇرعىدان ەلدە جانە شەتەلدە اباي تۇلعاسىنىڭ جاھاندىق اۋقىمىن كەڭىنەن تانىمال ەتۋگە ارنالعان يدەولوگيالىق- مازمۇندى جانە ساپالى ءىس- شارالاردى وتكىزۋگە نەگىزدەلەدى» ، - دەدى اقتوتى رايىمقۇلوۆا مادەنيەت جانە سپورت مينيسترلىگىنىڭ كەڭەيتىلگەن القا ماجىلىسىندە.

ءمينيستردىڭ ايتۋىنشا، بۇگىنگى تاڭدا اباي تويىن وتكىزۋ بويىنشا وڭىرلىك جوسپار بەكىتىلگەن. ل. ن. گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ بازاسىندا «اباي اكادەمياسى» عىلىمي- زەرتتەۋ ينستيتۋتى قۇرىلعان.

«27 - قاڭتاردا چەح ۇلتتىق كىتاپحاناسىندا اباي اتىنداعى مادەني- اقپاراتتىق ورتالىق اشىلدى. وسىنداي ورتالىقتار بۋداپەشت جانە براتيسلاۆا قالالارىندا اشىلادى» ، - دەدى ول.