ەرەۆانداعى قازاق ءتىلى، تاريحى جانە مادەنيەتى ورتالىعى ابايدىڭ ەسىمىمەن اتالدى

ەرەۆان. قازاقپارات- ەرەۆان مەملەكەتتىك ۋنيۆەرسيتەتى (ە م ۋ) جانىنداعى قازاق ءتىلى، تاريحى جانە مادەنيەتى ورتالىعىنا ابايدىڭ اتى بەرىلدى.

بۇل تۋرالى ق ر ەلشىلىگى ق ر پارلامەنت سەناتى ءتورايىمى داريعا نازاربايەۆانىڭ اتىنان ورتالىققا كومپيۋتەرلىك تەحنيكا مەن ادەبي وقۋلىقتاردى تاپسىرۋعا ارنالعان شارا بارىسىندا ە م ۋ رەكتورىنىڭ مىندەتىن اتقارۋشى گەگام گيەۆوركيان مالىمدەدى، دەپ حابارلايدى قازاقپاراتتىڭ مەنشىكتى ءتىلشىسى.

ەرەۆانداعى ە م ۋ جانىنداعى قازاق ءتىلى، تاريحى جانە مادەنيەتى ورتالىعىنا ق ر سەنات ءتورايىمى داريعا نازاربايەۆانىڭ اتىنان كومپيۋتەر، ينتەراكتيۆتى تاقتا، سونىمەن قاتار قازاق ءتىلىن ۇيرەنۋگە ارنالعان 120 قازاق سوزدىگى مەن جاڭا وقۋ ماتەريالدارى تاپسىرىلدى. ورتالىققا ارنالعان كومپيۋتەرلىك تەحنيكالار قازاق باعدارلامالارىمەن جابدىقتالعان، ول قازاق ءتىلىن ۇيرەتۋدىڭ زاماناۋي جانە ءتيىمدى تاسىلدەرىن پايدالانۋعا كومەكتەسەدى.

شارا بارىسىندا قازاقستاننىڭ ارمەنياداعى ەلشىسى تيمۋر ۋرازايەۆ ە م ۋ اكىمشىلىگىنە، پروفەسسور-وقىتۋشىلار قۇرامى مەن باسشىلىققا قازاق تاريحىن، مادەنيەتى مەن ءتىلىن زەرتتەۋگە قوسىپ جۇرگەن ۇلەستەرى ءۇشىن العىس ايتتى.

«175 جىلدىق مەرەيتويى كەزىندە ابايدىڭ ءتىلىن جاڭا قۇرىلعىلاردىڭ كومەگىمەن ارميان ستۋدەنتتەرىنە ۇيرەتۋ - قازاق ادەبيەتى جانە پوەزياسىمەن تانىسىپ، ەكى ەل اراسىنداعى مادەني ساباقتاستىقتى نىعايتۋعا كومەكتەسەدى. ال داريعا نازاربايەۆانىڭ ورتالىققا بەرگەن سىيجازباسى ەكى ەل اراسىنداعى مادەني- گۋمانيتارلىق قارىم-قاتىناستى دامىتۋعا اق تىلەك بولادى»، - دەپ اتاپ ءوتتى شارا بارىسىندا ەلشى ت. ورازايەۆ.

ە م ۋ رەكتورىنىڭ مىندەتىن اتقارۋشى گەگام گيەۆوركيان ۋنيۆەرسيتەت باسشىلىعى ورتالىققا اباي ەسىمىن بەرۋ تۋرالى شەشىم قابىلداعانىن مالىمدەدى.

«بىلتىر ءبىز ەرەكشە وقيعانىڭ كۋاسى بولدىق، «قازاق ادەبيەتىنىڭ انتولوگياسى» ارميان تىلىندە جارىق كوردى. بۇل ەكى ەلدىڭ ادەبيەتشىلەرى، عالىمدارى مەن لينگۆيستەرى سەرىكتەستىگىنىڭ وزىق ۇلگىسى. بيىل ابايدىڭ 175 جىلدىعى مەرەيتويىنىڭ كۋاسى بولامىز»، - دەپ اتاپ ءوتتى اكادەميك گەگام گيەۆوركيان.

سونىمەن قاتار، ول شارا بارىسىندا ۋنيۆەرسيتەت باسشىلىعى ورتالىققا كەڭىرەك ورىن قاراستىراتىنىن ايتتى.

ە م ۋ جانىنداعى قازاق ءتىلى، مادەنيەتى جانە تاريحى ورتىلىعى قازاقستان رەسپۋبليكاسىنىڭ ارمەنياداعى ەلشىلىگىنىڭ قولداۋىمەن 2010-جىلدىڭ 19- تامىزىندا اشىلعان بولاتىن.