اباي اندەرى «قازاق كونسەرتتىڭ» ءار كونسەرتىندە شىرقالادى - جەڭىس سەيدۋللا ۇلى
«ۇرپاقتان-ۇرپاققا جالعاسقان رۋحاني قازىنانى مۇرا ەتكەن ۇلى ابايدىڭ تاعىلىمىنا تەرەڭ بويلاعان سايىن «كوكىرەك كوزىڭ اشىلادى». جالپى، سوڭعى ۋاقىتتا رۋحاني ماسەلەلەرگە ەرەكشە كوڭىل ءبولىنىپ جۇرگەنىن بايقايمىز. ەلباسىنىڭ «بولاشاققا باعدار: رۋحاني جاڭعىرۋ» ماقالاسىنان باستاۋ العان «ۇلى دالانىڭ جەتى قىرى» جانە مەملەكەت باسشىسى قاسىم-جومارت توقايەۆتىڭ «اباي جانە ХХІ عاسىرداعى قازاقستان» ماقالاسى - سوعان دالەل»، - دەيدى جەڭىس سەيدۋللا ۇلى.
جەڭىس سەيدلۋللا ۇلى اباي حاكىمنىڭ «ادامنىڭ ادامشىلىعى ءىستى باستاعانىنان بىلىنەدى، قالايشا بىتىرگەندىگىنەن ەمەس» دەگەن جاقسى ءسوزى بارىن ەسكە سالدى.
«ءبىز مەملەكەت باسشىسىنىڭ ەل تاريحىنداعى جاڭا ونجىلدىقتى وسىنداي اۋقىمدى باعدارلامادان باستاپ، ۇلتتىق يدەيانى ابايدىڭ تاعىلىمعا تولى مۇراسى ارقىلى قالىپتاستىرىپ جاتقانىنا كۋامىز. مەنىڭشە، بۇل وتە جاقسى باعىت، سەبەبى ابايدى تانۋ سانامىزعا سەرپىلىس اكەلەدى. بۇل ەلىمىز ءۇشىن ابايدى جاڭاشا تانۋدىڭ، جاڭاشا باعالاۋدىڭ ۇلكەن جولى دەپ بىلەمىز. اباي اتامىزدىڭ باي مۇراسى، پوەزياسىنىڭ عاجاپ قۋاتى، وسيەت-ونەگەسى ۋاقىت وتكەن سايىن ءوزىنىڭ كوكەيكەستىلىگىن جوعالتپاي، كەرىسىنشە وزەكتىلىگى ارتۋدا. سوندىقتان پرەزيدەنتتىڭ «اباي ءسوزى ۇرپاقتىڭ باعىت الاتىن تەمىرقازىعىنا اينالۋى قاجەت» دەگەن ءسوزىن نەگىزگە الا وتىرىپ، ءبىز رۋحاني سانامىزدىڭ جاڭعىرۋى جولىندا ۇلى ابايدىڭ ەڭبەكتەرىن تاعى ءبىر سارالاپ، ءومىرىمىزدىڭ ءار سالاسىندا دۇرىس پايدالانۋدى ويلاستىرعانىمىز ابزال»، - دەيدى ول.
«قازاق كونسەرت» باسشىسىنىڭ سوزىنشە، پوەتيكالىق جانە كومپوزيتورلىق تۋىندىلارىمەن قازاق مۋزىكاسىنا جاڭا لەپ اكەلگەن ابايدىڭ ءان مۇراسى ەرەكشە سۇلۋلىعىمەن، كوركەمدىك بايلىعىمەن، اۋەزدىلىگىمەن قۇندى. بۇعان قوسا، وسكەلەڭ ۇرپاققا بەرەر تاربيەلىك ءمانى اباي اندەرىنىڭ قۇندىلىعىن ارتتىرا تۇسەدى.
«ەندىگى ماقسات - وسى وشپەس مۇرانى وسكەلەڭ ۇرپاقتىڭ ساناسىنا سىڭىرۋگە ۇلەس قوسۋ، رەسپۋبليكالىق جانە الەمدىك دەڭگەيدە ناسيحاتتاۋعا باعىتتالعان يگى شارالاردى جۇزەگە اسىرۋ. وسى ورايدا «قازاق كونسەرت» مەملەكەتتىك كونسەرتتىك ۇيىمى يگى باستامانى قولعا الدى. ۇلى اقىننىڭ 175 جىلدىعى اياسىندا وتكىزىلەتىن اۋقىمدى جوبالاردان بولەك، ابايدىڭ اندەرى «قازاق كونسەرتتىڭ» ءار كونسەرتىندە شىرقالماق. ءار كونسەرتتە قۇلاقتان كىرىپ، بويدى الار اندەر شىرقالسا، ۇلى اقىننىڭ ءان مۇراسى حالىققا جاقىن بولا ءتۇسىپ، رۋحاني قۇدىرەتىمەن قۋاتتاندىرا بەرمەك. بۇل يگى باستاما بارشا رەسپۋبليكالىق، وبلىستىق، قالالىق جانە اۋداندىق ونەر ۇيىمدارى تاراپىنان قولداۋ تاپسا، قازاق ونەرىنىڭ مەرەيى ارتا تۇسەدى دەگەن ويدامىن»، - دەپ ءتۇيدى ول.