ەلوردادا «ءبىز بىرگەمىز» اتتى قار تازالاۋ ناۋقانى باستالدى

نۇر- سۇلتان. قازاقپارات - ەلوردا جاستارى الەۋمەتتىك جەلىدە قار تازالاۋ بويىنشا چەللەندجدى باستادى، دەپ حابارلايدى قازاقپارات قالا اكىمدىگىنىڭ سايتىنا سىلتەمە جاساپ.

جاستار تۇرعىنداردى اۋلاسىنداعى قاردى تازالاپ، ونى بەينەجازباعا جازىپ، #بىزبىرگەمىز حەشتەگىمەن الەۋمەتتىك جەلىگە سالۋعا شاقىرادى. ۆولونتەرلەر اتالمىش چەللەندجدى باستاۋ يدەياسىن قالىڭ قاردىڭ ءتۇسۋى مەن كوممۋنالدىق قىزمەت جۇمىسشىلارىنا قولداۋ كورسەتۋمەن بايلانىستىرادى.

بۇگىنگى كۇننىڭ وزىندە ەلوردا ەرىكتىلەرىن بەلگىلى ءازىل- سىقاقشى، تەلەجۇرگىزۋشىسى تۇرسىنبەك قاباتوۆ، جۋرناليست، تەلەجۇرگىزۋشى اسحات سادىرباي، «نازار اۋدار» تەاترىنىڭ ارتىستەرى قولدادى.

«ءبىزدىڭ قالامىز، ەلىمىز - ول ءبىزدىڭ ۇلكەن ءۇيىمىز. ءار ازامات قالا تازالىعىنا ۇلەسىن قوسۋ كەرەك. ءبىز كوممۋنالدىق قىزمەتكەرلەرگە وسىلاي كومەكتەسكىمىز كەلەدى. بۇگىن ءبىراز قالىڭ قار ءتۇستى. ءبىز بۇل باستامانى قولدايمىز جانە دە باسقا ارىپتەستەرىمىزدى ءبىزدى قولداۋعا شاقىرامىز» ، - دەدى تۇرسىنبەك قاباتوۆ. سونىمەن قاتار، ول ەستافەتانى «فورمات» توبىنا، «ا. ي. » مۋزىكالىق- تەاتر ورتالىعى مەن «استانا» فۋتبول كلۋبىنا تابىس ەتتى.

بۇل ورايدا قار تازالاۋ بويىنشا اكسيانى ۆولونتەرلەر ۇنەمى وتكىزىپ تۇراتىندىعىن ايتا كەتكەن ءجون.

ەستەرىڭىزگە سالساق، ق ر پرەزيدەنتى قاسىم- جومارت توقايەۆتىڭ تاپسىرماسىمەن 2020 -جىل «ۆولونتەرلەر جىلى» بولىپ جاريالانعان بولاتىن.