مينيستر: ەكپەدەن باس تارتقاندار ءوز بالاسىنا عانا ەمەس، قوعامعا قاۋىپ ءتوندىرىپ وتىر

نۇر-سۇلتان. قازاقپارات – ق ر اقپارات جانە قوعامدىق دامۋ ءمينيسترى داۋرەن ابايەۆ ەكپە سالىنباعان بالالاردى بالاباقشاعا كىرگىزبەۋ تۋرالى جاڭا قاعيداعا قاتىستى پىكىر ءبىلدىردى، دەپ حابارلايدى قازاقپارات ءتىلشىسى.

«ءيا، بۇل - راديكالدى قادام جانە ونى تالقىلاعانبىز. ءبىراق، ەكپە سالماۋدىڭ كەسىرىنەن دە ءدال سونداي راديكالدى جاعدايعا تاپ بولدىق. وتكەن جىلى قىزىلشا اۋرۋىنىڭ 13 مىڭنان استام وقيعاسى تىركەلدى. ونىڭ p بالالار. بيىلدىڭ وزىندە 300 دەن استام وقيعا تىركەلدى. ونىڭ باستى سەبەبى - ەكپە سالدىرماۋ بولىپ وتىر. مۇندايدا مەملەكەت نە ىستەۋى كەرەك؟»، - دەدى مينيستر حابار ارناسىنداعى «اشىق ديالوگ» باعدارلاماسىندا.

مينيستر ەكپە بويىنشا حالىقارالىق تاجىريبەدەن مىسالدار كەلتىردى.

«ماسەلەن، يتاليادا ەكپە سالدىرماعان بالالارعا مەكتەپ پەن بالاباقشاعا كىرۋگە تىيىم سالىنعان. ال اتا-اناسىنا 500 ەۋروعا دەيىن ايىپپۇل سالىنادى. گەرمانيادا ەكپە سالدىرۋدان باس تارتقان اتا-انالارعا 2,5 مىڭ ەۋرو ايىپپۇل جۇكتەلەدى. ال بالالار مەكتەپكە كىرگىزىلمەيدى. وسىنداي تاجىريبەنى كوپتەگەن مەملەكەتتەر قولعا الۋدا. مۇندا ءبىر نارسەنى تۇسىنگەن ءجون: ەكپەدەن باس تارتۋ ارقىلى ادامدار ءوز بالاسىنا عانا ەمەس، تۇتاس قوعامدىق يممۋنيتەتكە قاۋىپ ءتوندىرىپ وتىر. ودان دەنساۋلىعى ءماز ەمەس باسقا ادامدار زارداپ شەگەدى. سوندىقتان، ءوزىن الەۋمەتتىك جاۋاپتى دەپ ويلايتىن اتا-انالار ەرىكتى تۇرلدە ەكپە سالدىرعاندارى ءجون»، - دەپ اتاپ ءوتتى ول.

سونىمەن بىرگە، د. ابايەۆ ەكپەنىڭ جاناما اسەرى بولاتىنىن دا جاسىرمادى.

«وكىنىشكە قاراي، اسقىنۋ تۇرىندەگى جاناما اسەرلەر دە بولۋى مۇمكىن. مامانداردىڭ ايتۋىنشا، مۇنداي اسقىنۋ ءجۇز مىڭ ەكپەدە ءبىر رەت كەزدەسەدى. ءساتسىز ۆاكتسيناتسيا قاۋپى قىزىلشا قاۋپىنەن اناعۇرلىم از. سوندىقتان، جەكەلەگەن جاعدايلار ەكپەدەن باس تارتۋدىڭ سەبەبى بولماۋى ءتيىس. ءبىراق، بۇل وقيعالار بالانىڭ ەكپە سالدىرۋعا دەيىنگى دەنساۋلىعىن تەكسەرتۋگە، باقىلاۋعا قوسىمشا ارگۋمەنت بولۋى ءتيىس»، - دەدى مينيستر.